სახალხო მოძრაობა არა ნაციზმს უფასო იურიდიულ დახმარებას სთავაზობს იმ მოქალაქეებს, რომლებიც ჟურნალისტებისგან თავს დაზარალებულად მიიჩნევენ. ამის შესახებ მოძრაობის წევრებმა და ადვოკატებმა სპეციალურ ბრიფინგზე განაცხადეს. ბრიფინგის შესახებ საზოგადოებრივმა მაუწყებელმა დაწერა.

ორგანიზაციის წარმომადგენლების თქმით, გახშირდა შემთხვევები, როდესაც ჟურნალისტები რესპონდენტების უფლებებს არღვევენ და ბოლო შემთხვევაც მათ ოფისში ტელეკომპანია რუსთავი 2-ის გადამღებ ჯგუფთან მომხდარს უკავშირდება.

არა ნაციზმის ერთ-ერთი დამფუძნებლის, ნანა კაკაბაძის განცხადებით, ორგანიზაცია დაეხმარება ყველას, ვინც თავს დაზარალებულად მიიჩნევს.

ნანა კაკაბაძემ რუსთავი 2-ის ჟურნალისტსა და ოპერატორს სიტყვიერი, ხოლო მისმა თანამშრომლებმა ფიზიკური შეურაცხყოფა მიაყენეს. ქართული ოცნების მხარდამჭერი ორგანიზაციის ხელმძღვანელის გაღიზიანება ჟურნალისტის კითხვებმა გამოიწვია. კურიერის გადამღებ ჯგუფზე თავდასხმის გამო, გამოძიება შსს-მ სისხლის სამართლის 3 მუხლით დაიწყო - ჟურნალისტურ საქმიანობაში ხელის შეშლა, სხვისი ნივთის დაზიანება და ოფისში უკანონო შეღწევის გამო.