სახელმწიფო უსაფრთხოების სამსახურის ანტიკორუფციულმა სააგენტომ ქრთამის აღების სანაცვლოდ ფსიქოტროპული საშუალებების უკანონო ბრუნვაში დახმარების ბრალდებით შპს რეგიონული ჯანდაცვის ცენტრის დირექტორის მოადგილე, ნუგზარ ჯ. დააკავა.

უწყების ცნობით, თბილისსა და გორში მდებარე აფთიაქებში ფსიქოტროპული საშუალებების უკანონო რეალიზაცია ხდებოდა.

"აღნიშნული აფთიაქების დირექტორები და ფაქტობრივი მფლობელები მატერიალური სარგებლის მიღების მიზნით, უნებართვოდ და სანებართვო პირობების უხეში დარღვევით, შესაბამისი რეცეპტის გარეშე ახდენდნენ ფსიქოტროპული და სპეციალურ კონტროლს დაქვემდებარებული მედიკამენტების რეალიზაციას, რითიც დიდი ოდენობით შემოსავალს იღებდნენ", — ვკითხულობთ სუს-ის განცხადებაში.

უწყების ცნობით, აღნიშნული აფთიაქების მფლობელები, 2017 წლის სექტემბრიდან 2018 წლის ივლისის ჩათვლით, ყოველთვიურად ფსიქოტროპული მედიკამენტების უნებართვოდ რეალიზაციის მფარველობისთვის, სსიპ სამედიცინო საქმიანობის სახელმწიფო რეგულირების სააგენტოს უფროსისთვის, გია თვალავაძისთვის გადასაცემად ნუგზარ ჯ-ს დიდი ოდენობით თანხებს უხდიდნენ.

სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა აღნიშნულ სისხლის სამართლის საქმეზე ჯამში პასუხისგებაში მისცეს 21 პირი, რომელთა მიერ უკანონო სამეწარმეო საქმიანობისა და ფსიქოტროპული საშუალებების ურეცეპტოდ რეალიზაციის შედეგად მიღებულმა შემოსავალმა საერთო ჯამში შეადგინა 4 094 709 ლარი.

გამოძიება დიდი ოდენობით ქრთამის აღებაში დახმარების, სამსახურებრივი უფლებამოსილების ბოროტად გამოყენების და ჯგუფურად ჩადენილი უკანონო სამეწარმეო საქმიანობის ფაქტებზე მიმდინარეობს. აღნიშნული მუხლები სასჯელის სახით თავისუფლების აღკვეთას 11 წლამდე ვადით ითვალისწინებს. გამოძიებას სახელმწიფო უსაფრთხოების სამსახურის ანტიკორუფციული სააგენტო აწარმოებს.

ე.წ. სააფთიაქო ნარკომანიის საქმეზე დაკავებულ გია თვალავაძეს სასამართლომ აღკვეთის ღონისძიების სახედ გირაო შეუფარდა. სამედიცინო საქმიანობის რეგულირების სააგენტოს ყოფილი უფროსი 20 000 ლარის სანაცვლოდ გაათავისუფლეს.

სახელმწიფო უსაფრთხოების სამსახურმა ე.წ. სააფთიაქო ნარკომანიის ბრალდებით წამლის რეგულირების სააგენტოს უფროსი, გია თვალავაძე 24 სექტემბერს დააკავა.