გაერთიანებული ოპოზიციის მხარდამჭერის, თაკო ჩარკვიანის თქმით, ქალაქის მერმა თავისი განცხადებით ბოროტმოქმედება "გააპრავა". ის აპირებს, რომ საერთაშორისო ორგანიზაციებს ინფორმაცია მიაწოდოს. თაკო ჩარკვიანი მოითხოვს, რომ ამ განცხადების შემდეგ, ქალაქის მერმა თანამდებობა დატოვოს.

"მან პრაქტიკულად მოახდინა შემდგომი ესკალაცია და მოუწოდა დაჯგუფებებს ოჯახების მომავალი შევიწროებისკენ. რა თქმა უნდა, ამას ცხადია გაგრძელება ექნება და ჩვენ საერთაშორისო ორგანიზაციებს შევატყობინებთ. პრაქტიკულად ოჯახი აღმოჩნდა დარტყმის ქვეშ", — განაცხადა ჩარკვიანმა ბრიფინგზე.

დღეს, 3 დეკემბერს კახა კალაძე თაკო ჩარკვიანსა და მის ოჯახზე თავდასხმას გამოეხმაურა. მისი განცხადებით, ძალადობა არავისთვის მისაღები არ არის. მისი თქმით, მთელი არჩევნების განმავლობაში ყურადღებას ამახვილებდა, რომ პირდაპირი ეთერიდან შეურაცხყოფა, მათ შორის დედის გინება, მიუღებელია.

"ძალადობა არავისთვის მისაღები არ არის, თუმცა ძალიან სამწუხაროა და მე ამაზე ყველა ჩემს გამოსვლაში და ინტერვიუსი მივუთითებდი, რომ კატეგორიულად მიუღებელია, რაც ხდებოდა მთელი არჩევნების განმავლობაში. პირდაპირ ეთერიდან დედის გინებაზე იყვენენ გადასული და არავის უნდა გაუკვირდეს, რომ ვიღაცა ვიღაცას შეურაცხყოფას მიაყენებს", — განაცხადა კალაძემ.

ჟურნალისტის კითხვაზე, იწვევს თუ არა აგრესიას ტელევიზიის ეკრანებიდან წამოსული "ლანძღვა", კალაძე პასუხობს, რომ "რასაც დასთეს, იმას მოიმკი".

ის დასძენს, რომ ძალადობა და ბულინგი კატეგორიულად მიუღებელია და სწორედ ამას აკეთებს, მისივე თქმით, რუსთავი 2-ის გენერალური დირექტორი, ნიკა გვარამია.

"იმუქრებოდა ყველას დაგთვლითო, ვინ უნდა დათვალოს გვარამიამ, ან ვინ უნდა ჩარეცხოს გვარამიამ?", — ამბობს კახა კალაძე.

შინაგან საქმეთა სამინისტრომ ამ ინციდენტში ბრალდებული სამი პირი ადმინისტრაციული წესით დააკავა, ხოლო ერთი სისხლის სამართლის წესით. ადმინისტრაციული წესით დაკავებულ სამ პირს შორის იყო დავით მაჭავარიანი. ის სასამართლომ გაამართლა იმ არგუმენტით, რომ ინციდენტის მონაწილეებს აშველებდა.