ფრანკფურტის გოეთეს უნივერსიტეტისა და მაქს პლანკის ინსტიტუტის მეცნიერებმა კიბოს სხეულში გავრცელების პროცესი ამოხსნეს.

როგორც ახალმა კვლევამ დაადგინა, მეტასტაზები ადამიანის სხეულში მცირე ზომის სისხლ-ძარღვებში გადაადგილდებიან. სიმსივნური უჯრედები უტევენ მოლეკულას, რომელსაც სიკვდილის რეცეპტორი 6 ჰქვია. ამის შემდეგ სისხლძარღვებში თვითგანადგურების პროცესი იწყება, რაც სიმსივნეს გავრცელების საშუალებას აძლევს.

მეცნიერების აზრით, სიკვდილის რეცეპტორი 6-ის დაბლოკვის შემთხვევაში შესაძლებელია სიმსივნის გავრცელება შეჩერდეს, რადგან ამჯერად კიბოს დაბლოკვის სხვა მექანიზმი არ არსებობს. მეტასტაზების გავრცელების შეჩერება კიბოს მკურნალობაში სერიოზული წინსვლა იქნება, რადგან ამ დაავადების სიკვდილიანობა, როგორც წესი, გამოწვეულია არა პირველადი წარმონაქმნის, არამედ სხეულში გავრცელებით.

სისხლძარღვების კედლების გარღვევის შემდეგ მეტასტაზები ენდოთელიუმის უჯრედებს უტევენ. უჯრედების ეს ფენა ქმნის სისხლსა და ლიმფურ კაპილარებს. ამ დროს ე.წ. ნეკროპტოზისის ანუ დაპროგრამებული სიკვდილი მიმდინარეობს. მეცნიერების თქმით, ეს პროცესი სიკვდილის რეცეპტორი 6-ის მოლეკულის დაზიანების შედეგად იწყება, რა დროსაც მეტასტაზებს ეძლევათ საშუალება თავისუფლად იმოძრაონ სისხლძარღვებში და სუსტ უჯრედებს შეუტიონ.

აღნიშნულ პროცესს გერმანელი მკვლევარები თაგვებზე ცდების ჩატარებისას დააკვირდნენ. გენეტიკურად მოდიფიცირებულ თაგვებში, რომელთა სისხლძარღვებში DR6 (Death Receptror 6) დაბლოკილი იყო, მეტასტაზები ნაკლებად გავრცელდა და შესაბამისად, ნეკროპტოზისის პროცესიც ნაკლებად წარიმართა.

კიბოს გავრცელების მეთოდის შესახებ მეორე ვერსიაც არსებობს. კალიფორნიის უნივერსიტეტის მეცნიერები ფიქრობენ, რომ მეტასტაზებს სისხლძარღვების გარეთაც შეუძლიათ გადაადგილება. ამერიკელი მკვლევარები მეტასტაზების გავრცელების ამ გზას ანგიოტროპიზმს უწოდებენ. მათი აზრით, მელანომას მეტასტაზებს აქვთ უნარი სისხლძარღვებს გარე კედლებიდან "ჩამოეკიდონ" და ისე გავრცელდნენ სხეულში, რა დროსაც ისინი ქიმიო თერაპიასაც გადაურჩებიან და არც DR6-ის დაბლოკვა შეაჩერებთ.

როგორც ეს ორი კვლევა ადასტურებს, კიბოს უჯრედები ერთმანეთისგან განსხვავდებიან და შესაბამისად, დაავადებასთან ბრძოლის წარმატებით გაგრძელება დამოკიდებულია იმაზე, თუ რამდენი გვეცოდინება მასზე.