ავიაკომპანია Wizz Air პასუხობს Hub Georgia-ს მიერ გავრცელებულ განცხადებას, მისი საქართველოს ბაზრიდან გასვლის ზეწოლასთან დაკავშირებით და ამბობს, რომ ეს სპეკულაციაა. კომპანიაში On.ge-ს განუცხადეს, რომ კომპანია საქართველოში არსებულ ქსელს აფართოებს.

"Wizz Air იშვიათად აკეთებს კომენტარს ავიაკომპანიის შესახებ გავრცელებულ სპეკულაციებზე, თუმცა უნდა აღინიშნოს, რომ Wizz Air იყო პირველი საერთაშორისო ავიაკომპანია, რომელმაც ქუთაისის აეროპორტში 2012 წელს რეისი განახორციელა. ბოლო 6 წლის განმავლობაში ავიაკომპანიამ საქართველოს ქსელში არსებული რეისებით 1,5 მილიონზე მეტი მგზავრის გადაყვანა უზრუნველყო 13 ქვეყნის 20 მიმართულებით. ამასთან, Wizz Air-მა 2018 წელს ქუთაისის საერთაშორისო აეროპორტში 9 ახალი ავიამიმართულება დაამატა, მათ შორის ისეთი ქალაქები, როგორიცაა რიგა, პარიზი, პრაღა, ათენი, ბარსელონა, რომი, ბუქარესტი, ვენა და ვროცლავი. ამასთან, ავიაკომპანიამ 2018 წლის მაისში ქუთაისის საერთაშორისო აეროპორტში განათავსა მეორე ბაზირებული ავიახომალდი, რომელიც 100 მილიონ დოლარზე მეტ ინვესტიციას წარმოადგენს", — ნათქვამია კომპანიის განცხადებაში.

კომპანიის ცნობით, Wizz Air-ის მიზანია, გააფართოვოს საქართველოში არსებული ქსელი და ქართველ მოგზაურებს შესთავაზოს უფრო მეტი დაბალბიუჯეტიანი ავიამიმართულება ევროპაში და მის ფარგლებს გარეთ.

HUB Georgia-ს აღმასრულებელი დირექტორი, ვასო ურუშაძე აცხადებს, რომ საქართველოს მთავრობა ავიაკომპანია Wizz Air-ის საქართველოს ბაზრიდან გაშვებას გეგმავს. მისი თქმით, ეკონომიკის სამინისტროს ზეწოლით, კომპანია ზამთრის ფრენებს არ უმტკიცებდნენ, თუმცა ეს პროცესი არჩევნების შემდეგ გადაიდო.

საქართველოს ეკონომიკისა და მდგრადი განვითარების სამინისტრო არ ადასტურებს არასამთავრობო ორგანიზაცია, HUB Georgia-ს მიერ გავრცელებულ ინფორმაციას. უწყებაში აცხადებენ, რომ ეს განცხადება დეზინფორმაციაა, რომელიც საზოგადოების შეცდომაში შეყვანასა და დესტაბილიზაციას ემსახურება.