მმართველი პარტიის დამფუძნებელმა და თავმჯდომარემ, ბიძინა ივანიშვილმა მის მიერ მხარდაჭერილი კანდიდატის, სალომე ზურაბიშვილის დამოუკიდებლობაზე ისაუბრა. ამის შესახებ ბიძინა ივანიშვილმა ტელეკომპანია იმედის საგანგებო რეჟიმში შექმნილ გადაცემა იმედია LIVE-ში განაცხადა.

"მერე ქალბატონი, მერე ევროპელი, რაც ჩვენ გვინდა, მერე ვინც ქალბატონი სალომეს ხასიათი იცის, მე სხვანაირად ვერ მივმართავ. რომ იცოდეთ, ძალიან მორიდებითა და მოწიწებით ვარ. ვინც მისი ხასიათი იცის და განცდა აქვს, რომ ავირჩიეთ დამოუკიდებელი კანდიდატი, აბსოლუტურად დამოუკიდებელი კანდიდატია, თავისი ხედვები აქვს, პრაქტიკა აქვს, გამოცდილება აქვს, გემოვნება აქვს ძალიან კარგი. საპარლამენტო რესპუბლიკის პრეზიდენტობის კანდიდატი უნდა იყოს ასეთი, ის, პირველ რიგში, ავტორიტეტი უნდა იყოს", — განაცხადა ბიძინა ივანიშვილმა.

კანდიდატი, რომლის დამოუკიდებლობაზეც ბიძინა ივანიშვილი საუბრობდა, მმართველი პარტიის წევრებმა სარეკლამო ბანერებზე ჩაანაცვლეს. არჩევნების მეორე ტურის დანიშვნის შემდეგ ზურაბიშვილი მედიაშიც იშვიათად ჩნდება, ის არ ესწრება მის მხარდასაჭერად გამართულ კონცერტებსაც.