მიუხედავად იმისა, რომ House of Cards-ის უკევინსპეისო სეზონმა კრიტიკოსებისგან საუკეთესო შეფასებები დაიმსახურა, სექსუალურ შევიწროებაში დადანაშაულებული კევინის გაშვებით განაწყენებულმა მაყურებელმა (განსაკუთრებით კი კაცებმა), აღმოჩნდა, რომ შოუს ფინალური სეზონი არ ნახეს.

როგორც გამოქვეყნებული რეიტინგი ცხადყოფს, შოუს მერვე ნაწილს, რომელშიც მთავარი აქცენტი რობინ რაითის პერსონაჟ კლერ ანდერვუდზე კეთდება, ძირითადად ქალებმა უყურეს, საბოლოო ჯამში კი მათმა რიცხვმა 54 პროცენტს მიაღწია. გასულ წლებში ეს მაჩვენებელი პირიქით იყო და ბანქოს სახლის მაყურებლების ძირითადი, 56 პროცენტი კაცები იყვნენ.

გარდა ამისა, გაზრდილია სერიალის მაყურებელთა ასაკიც. თუ აქამდე შოუს ძირითადად 35 წლამდე ადამიანები უყურებდნენ, ფინალურ სეზონში ძირითადი რაოდენობა 50-დან 64 წლამდე მაყურებელზე ნაწილდებოდა.

აღსანიშნავია ისიც, რომ სერიალის პრემიერის დღეს, პირველი ეპიზოდის მაყურებელთა რიცხვმა საშუალოდ 2,9 მილიონს მიაღწია, მაშინ როდესაც წინა სეზონზე ეს რიცხვი 5,5 მილიონი იყო.

მიუხედავად არც თუ ისე სახარბიელო შედეგისა, House of Cards-ის მერვე სეზონი მაინც ერთ-ერთი ყველაზე ყურებადი სერიალი აღმოჩნდა, რომელსაც, ბოლო მონაცემებით, კვირის განმავლობაში საშუალოდ თითქმის 31 მილიონი ადამიანი უყურებს.