ქართული ოცნების დეპუტატს, ზვიად კვაჭანტირაძეს მიაჩნია, რომ საპრეზიდენტო კანდიდატის, სალომე ზურაბიშვილის პოსტი პიანისტ ხატია ბუნიათიშვილზე სარკაზმი იყო.

რამდენიმე საათის წინ პრეზიდენტობის კანდიდატმა ფეისბუქის თავის ანგარიშზე ხატია ბუნიათიშვილს მადლობა უხდიდა, თუმცა რისთვის უცნობია. მან გამოაქვეყნა გერმანულენოვანი დოკუმენტური ფილმის 48 Stunden Georgien აფიშა, რომელშიც ხატია ბუნიათიშვილი მონაწილეობს.

ფოტოს კომენტარებში მომხმარებლები კითხულობდნენ ნიშნავდა თუ არა ეს პოსტი ხატია ბუნიათიშვილის მხარდაჭერას ზურაბიშვილის მიმართ. რამდენიმე წუთში პრეზიდენტობის კანდიდატმა პოსტი წაშალა.

ფოტო: მარიამ კასრაშვილი / Facebook

ხატია ბუნიათიშვილი ცნობილი ქართველი პიანისტია, რომელიც ღიად აფიქსირებდა თავის მხარდაჭერას ექს-პრეზიდენტის, მიხეილ სააკაშვილის მიმართ. ის მონაწილეობდა მის მხარდასაჭერ კონცერტებსა და კლიპებში.

On.ge-მ სცადა ამასთან დაკავშირებით ინფორმაცია მიეღო სალომე ზურაბიშვილის პრესსამსახურისგან, თუმცა ისინი ჩვენს ზარებს არ პასუხობენ.