პარტია ქართული ოცნების გენერალური მდივნის კახა კალაძის განცხადებით, ნაციონალური მოძრაობა ავრცელებს ცრუ ინფორმაციას, თითქოს 2008 წლის რუსეთ-საქართველოს ომში მონაწილე ქართველ სამხედრო მოსამსახურეებს ჰააგაში გასამართლების საფრთხე ემუქრებათ.

კახა კალაძე აცხადებს, რომ განცხადებები აბსურდულია და თეორიული საფუძველიც კი არ აქვს.

"ნაციონალური მოძრაობა უტიფრად ცდილობს საზოგადოებისა და ჩვენი გმირების შეცდომაში შეყვანას, მათი სახელის პარტიული მიზნებისთვის გამოყენებას", — აცხადებს კალაძე.

მისივე თქმით, ნაციონალურმა მოძრაობამ თავად ჩაიდინა დანაშაული საქართველოს ისტორიისა და მომავლის წინაშე და ახლა "ტვინის გამორეცხვის" პოლიტიკას აგრძელებს.

"რუსი პოლიტტექნოლოგების რჩევით და რეკომენდაციით, გმირი სამხედროების ზურგს ამოფარებულები ცდილობენ სხვას დააბრალონ ის, რაც თავად დაუშავეს ხალხს და ქვეყანას. ამ პრინციპზეა, ზოგადად, აგებული მთელი მათი პროპაგანდა და ეს პრინციპი ყველაზე თვალსაჩინოდ აგვისტოს ომის და ამ ომთან დაკავშირებულ საკითხებში ვლინდება", — განაცხადა კალაძემ საგანგებო ბრიფინგზე.

პარტიის გენერალური მდივანი ამბობს, რომ არავის მისცემენ უფლებას დეპოლიტიზებული ჯარი ისევ პოლიტიკურ თამაშებში ჩაითრიონ.

"სწორედ ხალხთან ერთად დავიცავთ ჩვენს სამხედროებს თქვენი შანტაჟისგან, ყველა საერთაშორისო სტრუქტურაში მოვიგებთ თქვენ მიერ წაგებულ საქმეებს, თქვენი ღალატით გახლეჩილ ქვეყანას გავამთლიანებთ და წავიყვანთ წინ", — თქვა კალაძემ.

იუსტიციის მინისტრის განცხადება

14 ნოემბერს იუსტიციის მინისტრმა, თეა წულუკიანმა ტელეკომპანია იმედის ეთერში განაცხადა, რომ ჰააგის სისხლის სამართლის სასამართლოს პროკურორი ფატუ ბენსუდა აგვისტოს ომის დროს ჩადენილ დანაშაულებებს იძიებს. მინისტრის განმარტებით, თუკი ის მივა დასკვნამდე, რომ გარკვეულ ეპიზოდებში მართლაც არის დანაშაული მომხდარი, მან შეიძლება კონკრეტული ადამიანების დაკავების მოთხოვნით სასამართლოს მიმართოს. წულუკიანის განცხადებით, ამ საქმეში საქართველოს ხელისუფლება არ იქნება და ვერც იქნება წარმოდგენილი, როგორც მხარე.

თეა წულუკიანის განცხადება გააკრიტიკეს ოპოზიციის წარმომადგენლებმა. ევროპული საქართველოს დეპუტატის, ელენე ხოშტარიას განცხადებით, თეა წულუკიანი და მთლიანად ხელისუფლება სამხედროებს კი არ იცავს, არამედ მათ წინააღმდეგ გამოდის.

ნაციონალური მოძრაობის წევრის, ზაალ უდუმაშვილის თქმით, წულუკიანმა მოღალატეობრივი და ანტისახელმწიფოებრივი განცხადება გააკეთა.

იუსტიციის მინისტრის განცხადებას გამოეხმაურა გაერთიანებული ოპოზიციის პრეზიდენტობის კანდიდატი, გრიგოლ ვაშაძე. მან საგანგებო ბრიფინგზე თქვა, რომ "საქართველოს სახელმწიფო მისი იუსტიციის მინისტრის სახით, ხელებს იბანს 2008 წლის ვეტერანებთან დაკავშირებით და აცხადებს მათ კერძო პირებად". გრიგოლ ვაშაძე იუსტიციისა და საგარეო საქმეთა მინისტრების თანამდებობებიდან გადადგომას ითხოვს.

მოგვიანებით, თეა წულუკიანმა იმედის ეთერში გაჟღერებული განცხადება განმარტა და თქვა, რომ ნაციონალური მოძრაობა ამ თემის პოლიტიკურ ინსტრუმენტაციას ეწევა.

"ქართული ოცნების მთავრობა ნაციონალური მოძრაობის მთავრობისგან განსხვავებით ყველაფერს აკეთებდა და აკეთებს იმისთვის, რომ ჩვენი ჯარის ღირსება იყოს დაცული, რომ ანწუხელიძის, სოფრომაძის და სხვების საქმეები და ეპიზოდები გამოვაძიებინოთ, თუ ეს შეიძლება, მტკიცებულებების შეგროვებით შევძლოთ ის, რომ ბენსუდამ დააყენოს რუსი სამხედროების და ასევე იმ ოსი მათი წარმომადგენლების პასუხისმგებლობის საკითხი, ვინც შესაძლოა ქართველების ეთნიკურ წმენდაში იყო ჩართული", — განაცხადა იუსტიციის მინისტრმა.

სისხლის სამართლის საერთაშორისო სასამართლოს (ICC-ის) პროკურორი ფატუ ბენსუდა იძიებს 2008 წლის აგვისტოს ომში ჩადენილ შესაძლო დანაშაულებებს. ფატუ ბესნუდა ამ საქმის გამოსაძიებლად და მოწმეების დასაკითხად უკვე არაერთხელ იმყოფებოდა საქართველოში.