"ბუტა რობაქიძის დედაც ქუჩაშია", — ასე უპასუხა იურიდიულ საკითხთა კომიტეტის ხელმძღვანელმა, ეკა ბესელიამ დეპუტატ ოთო კახიძის განცხადებას, რომელიც ზაზა სარალიძისა და მისი ოჯახის წევრების ქუჩაში ყოფნას ეხებოდა.

ბიუროს სხდომაზე ოპოზიციამ ხორავას ქუჩის საქმეზე დაიწყო საუბარი, რასაც დეპუტატებს შორის კამათი მოყვა. მმართველი გუნდის წევრებმა "ცხრაწლიანი რეჟიმი" და მისი შედეგები არაერთხელ ახსენეს.

ევროპული საქართველოს დეპუტატი, ოთო კახიძე ამბობდა, რომ "ცხრა წლიდან" მმართველმა გუნდმა, დასკვნები ვერ გამოიტანა და "ცხრა წელზე" საუბარი ამ შემთხვევაში არარელევანტურია:

"ამიტომ ცხრა წელზე კი არ უნდა ვისაუბროთ, უნდა ვისაუბროთ მომავალზე და აწმყო არის ასეთი: ზაზა სარალიძე, მისი მეუღლე და მისი დედა არის ქუჩაში გარეთ და ეძებს სამართალს".

სწორედ ამ განცხადებას მოყვა ეკა ბესელიას რეპლიკა.

"ანუ ზაზა სარალიძეს იმიტომ არ აღუდგენთ სამართალს, რომ ის "ცხრა წელია" დამნაშავე", — განაცხადა ოთო კახიძემ.