"7 ნოემბერი არის წინა ხელისუფლების უმძიმესი შეცდომა და გაკვეთილი ყველა შემდგომი ხელისუფლებისათვის", — ასე აფასებს გაერთიანებული ოპოზიციის საპრეზიდენტო კანდიდატი, გრიგოლ ვაშაძე 2007 წლის 7 ნოემბერს პარლამენტის წინ საპროტესტო აქციის დარბევას.

"მართალია, მაშინ არავითარი კავშირი არ მქონდა ხელისუფლებასთან, არც ერთი თანამდებობა არ მეკავა და რიგითი კერძო პირი ვიყავი, მაინც სრულად ვიზიარებ ამ დღით გამოწვეულ პასუხისმგებლობას და საკუთარ პრობლემადაც მივიჩნევ", — წერს ვაშაძე ფეისბუქზე.

პრეზიდენტობის კანდიდატი აღნიშნავს, რომ 7 ნოემბერს დადასტურდა, რომ წინა ხელისუფლებამ ყველა მოქალაქის პოზიციას პატივი არ სცა. გარდა ამისა, ვაშაძე ამბობს, რომ უფრო მძიმე იყო ტელეკომპანია იმედში შესვლა და მაუწყებლობის შეწყვეტა:

"ბევრჯერ მისაუბრია ამ საკითხზე ჩემს მეგობარ გიორგი თარგამაძესთან, და ყოველი საუბრის ბოლოს, მივდიოდი დასკვნამდე, რომ ეს იყო ეროვნული ტრაგედიის მასშტაბის მოვლენა და ვერანაირი გამართლება ამის ჩამდენ ხელისუფლებას ვერ ექნება. მიუხედავად იმისა, რომ დღევანდელი იმედი სისტემატიურად მიძღვნის ფეიკ ნიუსებს, ჩემი პრეზიდენტობის პერიოდში, ვერავინ შეზღუდავს მედიის უფლებას, თუნდაც დამცინოს, დამაბრალოს სიცრუე, გაავრცელოს ყალბი ინფორმაცია ჩემზე ან სხვა რომელიმე პოლიტიკურ ლიდერზე. ეს პროფესიული სტანდარტის საკითხია და არ არის ხელისუფლების საქმე".

მისივე თქმით, ქართული ოცნება წინა ხელისუფლების შეცდომებს იმეორებს და 600 ათასზე მეტ მოქალაქეს, რომელმაც ვაშაძეს მისცა ხმა, "მტრებად აცხადებს":

"ჩვენ აღარ გვინდა 7 ნოემბერი, აღარ გვინდა წარსული, ყველა გაკვეთილი ნასწავლია, ყველა შეცდომა გაანალიზებულია, ყველა დასკვნა გამოტანილია".

2007 წლის 7 ნოემბერს სპეცნაზმმა პარლამენტის წინ საპროტესტო აქცია ცრემლსადენი გაზით, ხელკეტებით, რეზინისი ტყვიებითა და წყლის ჭავლით დაშალა. ნიღბიანი პირები ტელეკომპანიების იმედი და კავკასიის შენობებში შევიდნენ, მაუწყებლებმა მუშაობა შეწყვიტეს.

კრიზისის საპასუხოდ პრეზიდენტმა სააკაშვილმა ქვეყანაში ვადამდელი არჩევნები გამოაცხადა, რომელიც 2008 წლის იანვარში ჩატარდა.