საქართველოს ეროვნული ბანკის ინფორმაციით, ლარის მიმდინარე კურსზე უარყოფითი გავლენა აქვს საპრეზიდენტო არჩევნების პერიოდში არსებულ გარემოს. უწყებაში აღნიშნავენ, რომ ეს გარემო სავალუტო ბაზარზე აისახება.

მათი ინფორმაციით, ბოლო პერიოდში სავალუტო ბაზარზე გაცვლითი კურსის მერყეობის მიზეზები არ უკავშირდება ფუნდამენტურ ეკონომიკურ ფაქტორებს.

"ეროვნული ბანკი დაბეჯითებით მოუწოდებს საჯარო პირებსა და ექსპერტებს, თავი შეიკავონ ვალუტის კურსის შესახებ უსაფუძვლო განცხადებებისა და პროგნოზებისაგან, რათა ამით კიდევ უფრო არ გაძლიერდეს არასწორი მოლოდინები", — აღნიშნულია ეროვნული ბანკის განცხადებაში.

უწყებაში აღნიშნავენ, რომ ბაზარზე არსებული აშშ დოლარის ფასი გადაჭარბებულია.

"ეროვნული ბანკი მოსახლეობას და ეკონომიკურ აგენტებს ურჩევს, ნუ მიიღებენ ნაჩქარევ გადაწყვეტილებებს, რომელიც, დიდი ალბათობით, მათვე დააზარალებს", — ვკითხულობთ განცხადებაში.

ლარი დოლართან მიმართებით ბოლო ერთი თვის განმავლობაში დაახლოებით 12 თეთრით გაუფასურდა.