საკრებულოს ოპოზიცია თბილისის მერს, დავით ნარმანიას ხუთშაბათს, 25 აგვისტოს, საკრებულოს სხდომაზე იბარებს. ამის შესახებ შესაბამისმა პირებმა სპეციალურ პრესკონფერენციაზე განაცხადეს.

როგორც ენმ-ს წევრმა, ირაკლი აბესაძემ განმარტა, დავით ნარმანიამ თბილისში ხეების უკანონო ჭრასთან დაკავშირებით მოქალაქეებს პასუხი უნდა გასცეს:

"თბილისში, ყაზბეგის გამზირზე ათეულობით უკანონოდ გაჩეხილმა ხემ კიდევ ერთხელ დაადასტურა, რომ თბილისის მერიაში ბევრი სისტემური ხარვეზი გვაქვს, რომელზეც თბილისის მერი და მერიის ხელმძღვანელობა პასუხისმგებლობას არ იღებს. ამიტომ, ჩვენ კოლეგებთან ერთად, საკრებულოში ვიბარებთ ხუთშაბათს თბილისის მერს, რომელსაც მოქმედი კანონმდებლობიდან გამომდინარე, მოუწევს პასუხი გასცეს ამ და სხვა შეკითხვებს, რომელიც მოქალაქეებს აწუხებს".

დამოუკიდებელი დეპუტატის, ალეკო ელისაშვილის თქმით კი, ვინაიდან თბილისის მერს არ აქვს პასუხი, ვინ არის პასუხისმგებელი აღნიშნული ხეების მოჭრაზე, მან არ იცის საკუთარი სტატუსი:

"მთავარი კითხვაა, ერკვევა თუ არა ნარმანია საკუთარ უფლებამოსილებაში. თბილისში საღი ხეები მოიჭრა და ნარმანია გამოდის და არ ვიცი ვისი დანაშაული არისო. ეს ნიშნავს, რომ მან არ იცის საკუთარი სტატუსი. მეორე, რაც არის ის, რომ რატომ აწერს საღი ხეების მოჭრას ხელს გამწვანების სამსახურის უფროსი და რატომ არ აგებს ის პასუხს. საკრებულოს დეპუტატთა 1/4-ს ხელმოწერის შემდეგ ის ვალდებულია მოვიდეს და უპასუხოს ჩვენ კითხვებს".

თბილისის მერს საკრებულოში მისვლისკენ მოუწოდებენ რესპუბიკელები და გაერთიანებული დემოკრატებიც.

17 აგვისტოს ყაზბეგის გამზირის 24 ნომერში ასწლოვანი ნაძვები გაჩეხეს. ტერიტორიაზე, რომელზეც ადრე სისხლის გადასხმის ინსტიტუტი იყო, ახლა ნგრევა მიმდინარეობს. ადგილზე სამშენებლო კომპანია ორბი ჯგუფი 42 სართულიანი შენობის აშენებას აპირებს.

სულ მოჭრილია 13 წიწვოვანი ხე. ფაქტის გასაპროტესტებლად ადგილზე შეიკრიბნენ ადგილობრივი მაცხოვრებლები და პარტიზანული მებაღეობის წარმომადგენლები.