პარტია ევროპული საქართველოს ერთ-ერთი ლიდერი სერგი კაპანაძე ამბობს, რომ ყოფილი მთავარი პროკურორისთვის ბრალის წარდგენა, წინასაარჩევნო კამპანიას უკავშირდება.

"ფარცხალაძისთვის ბრალის წაყენება, მიუხედავად იმისა, რომ არ ვიცით ზუსტად, რაზე არის და რას ითხოვს პროკურატურა, ძალიან ჰგავს ქართულ მულტფილმებში რომ არის, ბარტყის გადაგდებას ივანიშვილის მხრიდან", — ამბობს სერგი კაპანაძე.

სერგი კაპანაძის თქმით, მმართველი გუნდი შეშფოთებულია არჩევნების შედეგების შემდეგ და ცდილობს საზოგადოებას მოაჩვენოს, რომ პრობლემებს გადაჭრიან:

"ეს არის უბრალოდ, სასოწარკვეთილი ადამიანის რაღაც აგონიური ქცევა პირველიდან მეორე ტურის პერიოდში... ეს საქმე ერთ წელიწადზე მეტი არის პროკურატურაში თაროზეა შემოდებული და ყველამ კარგად იცის ყველაფერი. ვიდეოზეა აღწერილი და არაფერი ამდენი ხანი ამას არ სჭირდებოდა".

ლაშა თორდიას ცემის საქმე

2017 წლის 12 მაისს სახელმწიფო აუდიტის სამსახურის ხელმძღვანელს, ლაშა თორდიას თავს დაესხნენ. თორდია თავდასხმაში ყოფილ პროკურორ ფარცხალაძეს ადანაშაულებდა.

თორდიას მიაჩნდა, რომ თავდასხმა მისი სამსახურის მიერ ყოფილი პროკურორის შესახებ მასალების მოგროვებას უკავშირდება. გენერალური აუდიტი ამბობდა, რომ ფარცხალაძეს დაუსჯელობის განცდა აქვს.

ბრალდებების პასუხად, ფარცხალაძემ განაცხადა, რომ გენერალური აუდიტი იტყუებოდა და კონფლიქტის ინიციატორი თავადვე იყო. მისი თქმით, თორდია მთვრალ მდგომარეობაში იმყოფებოდა და ხელი პირველად მან მოიქნია.

"როგორც ჩანს, მას გულში აქვს ჩარჩენილი ჩემი გარკვეული ქმედებები სამართალდამცავ უწყებებში ჩემს საქმიანობასთან დაკავშირებით, რაზეც შესაბამის ინფორმაციას მივაწვდი გამოძიებას", — ამბობდა ფარცხალაძე. თუმცა, მომხდარიდან 4 დღის განმავლობაში ის დაკითხვაზე არ დაიბარეს. უწყებაში ამბობდნენ, რომ გამოძიების პრეროგატივა იყოს ის, თუ როდის დაკითხავდენ ყოფილ პროკურორს.

2017 წლის 16 მაისს ფარცხალაძის დაკითხვისკენ პროკურატურას პარლამენტის თავმჯდომარემ მოუწოდა. 17 მაისს ყოფილი პროკურორი დაკითხეს.

ფარცხალაძის გამოკითხვიდან ერთ კვირაში, 24 მაისს სოციალურ ქსელში ლაშა თორდიას სხვა ინციდენტის ამსახველი კადრები გავრცელდა. თორდია და არასამთავრობოები აცხადებდნენ, რომ კადრების გავრცელება საეჭვოდ დაემთხვა ფარცხალაძესთან ინციდენტს და ის დამოუკიდებლად უნდა გამოეძიებინათ.

საქართველოს შინაგან საქმეთა სამინისტრომ აღნიშნული ინციდენტის გამოძიების შუალედური შედეგები გამოაქვეყნა. უწყების ინფორმაციით, ნეიტრალური მოწმეების გამოკითხვით დადგინდა, რომ ინციდენტის დროს პირველმა ხელი ლაშა თორდიამ მოიქნია და არა ფარცხალაძემ.