სომხეთის პარლამენტის რიგგარეშე სხდომაზე ქვეყნის პრემიერ-მინისტრი ზედიზედ მეორედ არ აირჩიეს, რაც ნიშნავს, რომ საკანონმდებლო ორგანო დაშლილად გამოცხადდა და ქვეყანაში ვადამდელი საპარლამენტო არჩევნები ჩატარდება, წერს რადიო თავისუფლების სომხური ბიურო.

როგორც პაშინიანმა განაცხადა, ვადამდელი საპარლამენტო არჩევნები, სავარაუდოდ 9 დეკემბერს ჩატარდება.

ეროვნულმა კრებამ პრემიერ-მინისტრი 24 ოქტომბერსაც არ აირჩია. ორივე ჯერზე პრემიერობის ერთადერთი კანდიდატი ნიკოლ პაშინიანი იყო და კანდიდატურის წარდგენა ფორმალურ ხასიათს ატარებდა.

ცარუკიანისა და დაშნაკცუტიუნის ფრაქციებმა კენჭისყრის წინ განაცხადეს, რომ მონაწილეობას არ მიიღებენ. სომხეთის რესპუბლიკური პარტიის ფრაქციამ განაცხადა, რომ პაშინიანის კანდიდატურას მხარს არ დაუჭერენ. ელკმა კი ხმის მიცემისგან თავი შეიკავა.

პაშინიანი ტაქტიკური მიზეზების გამო 16 ოქტომბერს გადადგა. პაშინიანის გეგმის მიხედვით, პარლამენტს მომდევნო ორი კვირის განმავლობაში ორივე ჯერზე პრემიერი ვერ უნდა აერჩია, რის გამოც, კონსტიტუციის მიხედვით, სომხეთის ეროვნული კრება დაშლილად გამოცხადდებოდა და ქვეყანაში ვადამდელი საპარლამენტო არჩევნები დაინიშნებოდა. პაშინიანს სხვა ფრაქციებთან შეთანხმებული ჰქონდა, რომ არც ერთი არ წარადგენდა პრემიერ-მინისტრობის კანდიდატს.

მიმდინარე წლის მაისში პრემერ-მინისტრად დანიშვნის შემდეგ ნიკოლ პაშინიანი ხშირად ამბობდა, რომ ქვეყანას პოლიტიკური სტაბილურობისთვის ვადამდელი საპარლამენტო არჩევნები სჭირდება.

ამ ეტაპზე ეროვნულ კრებაში უმრავლესობას რესპუბლიკური პარტიის ფრაქცია წარმოადგენს, რომლის ლიდერი იყო ყოფილი პრეზიდენტი და პრემიერ-მინისტრი სერჟ სარგსიანი. სარგსიანი აპრილში ხავერდოვანი რევოლუციის შედეგად გადადგა.