მარიხუანის მოხმარების რეგულირების შესახებ შინაგან საქმეთა სამინისტროს კანონპროექტს საქართველოს პარლამენტის პლენარულ სხდომაზე მეორე მოსმენით მხარი დაუჭირეს. კენჭისყრაში მონაწილეობა სულ 84-მა დეპუტატმა მიიღო და ყველა მათგანის ხმა დადებითი იყო. კენჭისყრას არ ესწრებოდნენ ოპოზიციური პარტიის დეპუტატები.

კენჭისყრის პროცესის დასაწყებად კვორუმი პირველ ჯერზე ვერ შედგა და რეგისტრაცია ხმის მისაცემად 76 დეპუტატის ნაცვლად 72-მა გაიარა. კვორუმი მხოლოდ მეორე ცდაზე 84 დეპუტატით შეივსო.

მარიხუანის მოხმარების კონტროლის შესახებ კანონპროექტის განხილვას, რომელსაც ხმა 84-მა დეპუტატმა მისცა, მხოლოდ რამდენიმე პარლამენტარი ესწრებოდა. საქართველოს პარლამენტის პირდაპირ ეთერში On.ge-მ 4 დეპუტატი დაითვალა.

ფოტო: კადრი ვიდეოდან / მეორე არხი

საქართველოს პარლამენტში, მარიხუანის მოხმარების რეგულირების შესახებ კანონპროექტს განიხილავენ. კანონი შსს-მ საკონსტიტუციო სასამართლოს გადაწყვეტილების შემდეგ მოამზადა, რომლის მიხედვითაც, მარიხუანის მოხმარება დასჯადი ქმედება აღარაა.

მარიხუანის მოხმარების შეზღუდვები

  • მარიხუანის მოხმარება საზოგადოებრივი თავშეყრის ადგილებში, საზოგადოებრივ ტრანსპორტში, სკოლებისა და საგანმანათლებლო დაწესებულებების მიმდებარე ტერიტორიაზე იკრძალება;
  • მარიხუანის მოხმარება 21 წლამდე პირებს აეკრძალებათ, ხოლო მათი დაყოლიება ნარკოტიკული საშუალების მოხმარებაზე სისხლის სამართლის დანაშაული იქნება;
  • მარიხუანის მოხმარება სამსახურებრივი მოვალეობის შესრულებისას აკრძალული იქნება როგორც საჯარო მოხელეებისთვის, ისე კერძო სექტორში მომუშავე პირებისთვის;
  • ნარკოტიკული საშუალებების, მათ შორის მარიხუანის მოხმარების პოპულარიზაციის ან რეკლამირებისთვის სანქცია იზრდება;
  • სატრანსპორტო საშუალებების მართვა ნარკოტიკული საშუალებების, მათ შორის მარიხუანას ზემოქმედების ქვეშ სისხლის სამართლის წესით დაისჯება;
  • მარიხუანის მოხმარების კანონპროექტი სამოქალაქო უფლებების, მათ შორის გარკვეული პროფესიის ადამიანებისთვის პროფესიული საქმიანობის უფლების ჩამორთმევას ითვალისწინებს.
  • კანონპროექტის მიხედვით, მარიხუანის ფლობისა და გასაღების მიმართ რეგულაცია არ იცვლება და აღნიშნული ქმედებები კვლავ სისხლის სამართლის წესით დაისჯება.