ქართული ოცნების დეპუტატმა, ნუკრი ქანთარიამ პარლამენტის პლენარული სხდომიდან საზოგადოებას მიმართა და უთხრა, რომ "ქვეყანას მეორე ტურის ხიფათი უახლოვდება". ქანთარიამ ოცნების სხვა ლიდერების მსგავსად გაიმეორა, რომ ესმის არჩევნებზე არმისული ამომრჩევლის გულდაწყვეტა და წყენის დაგროვება ხელისუფლების მიმართ. თუმცა, მათ წყენის გადადებისკენ მოუწოდა.

"ყველანი ერთად არ დავუშვებთ რუსული მენტალიტეტის ჩინური მატრიოშკის გაპრეზიდენტებას, რომლის შიგნითაც ზის სააკაშვილი და იმის შიგნით სხედან სხვა მატრიოშკები", — განაცხადა ქანთარიამ და აღნიშნა, რომ ქართული ოცნების გვარდიის იმედი აქვს.

ქანთარიას თქმით, სააკაშვილის ჩამოსვლის არავის ეშინია. "უბრალოდ მათი ჩამოსვლით ყველა წარმატება წაიშლება და პრობლემები დაგროვდება", — აღნიშნა მან.

ხელისუფლება, დამოუკიდებელი კანდიდატი და მედია ვაშაძის წინააღმდეგ

მას შემდეგ, რაც არჩევნების პირველი ტურის შედეგები გახდა ცნობილი მმართველი პარტიის მხარდაჭერილმა კანდიდატმა, სალომე ზურაბიშვილმა ორი დღის განმავლობაში ამ საკითხზე არ ისაუბრა. გავრცელდა ინფორმაცია, რომ ის კანდიდატურის მოხსნას აპირებდა. ჟურნალისტების კითხვაზე რას აპირებდა კანდიდატი, მან უპასუხა "როცა დაგიბარებთ, მაშინ გიპასუხებთ".

ამ დღეების განმავლობაში შეიცვალა ხელისუფლების რიტორიკაც. მაგალითად, ქვეყნის პრემიერ-მინისტრმა თქვა, რომ ქართული საზოგადოებისგან შეცდომებზე მკაფიო გზავნილი მიიღეს. ქართული ოცნების გენერალურმა მდივანმა, კახა კალაძემ კი აღნიშნა, რომ ხელისუფლებას ჰქონდა გადაჭარბებული თავდაჯერება და არ ჰქონდა საკმარისი კომუნიკაცია საზოგადოებასთან. მისივე თქმით, ამომრჩევლის ნაკლებობა გამოიწვია იმანაც, რომ არ ჰყავდათ საკუთარი კანდიდატი და მხარი დაუჭირეს ზურაბიშვილს.

თუმცა, მეორე დღეს, მმართველი პარტიის მხარდაჭერილი კანდიდატი ბრიფინგზე კალაძესთან და ოცნების სხვა წევრებთან ერთად წარსდგა და დაადასტურა, რომ მეორე ტურში მონაწილეობას მიიღებს. მისი თქმით, არ დაუთმობს ქვეყანას გრიგოლ ვაშაძესა და რუსეთს.

სალომე ზურაბიშვილისა და მმართველი პარტიის გარდა, მეორე ტურში გრიგოლ ვაშაძეს ბრძოლა გამოუცხადა ტელეკომპანია იმედმაც. ზურაბიშვილის ბრიფინგის შემდეგ ტელევიზიაში განაცხადეს, რომ არ დაუშვებენ რეჟიმის დაბრუნებას და მუშაობის საგანგებო რეჟიმზე გადადიან.