თბილისის მერმა და ქართული ოცნების ლიდერმა, კახა კალაძემ იმ მიზეზებზე ისაუბრა, რის გამოც მათ მიერ მხარდაჭერილი კანდიდატი, სალომე ზურაბიშვილი პირველივე ტურში პრეზიდენტი ვერ გახდა. მისი თქმით, მიზეზი ისაა, რომ მხოლოდ შიდა კვლევებს ვეყრდნობოდით, რამაც შეასუსტა განწყობების აღქმა.

"ამ არჩევნებით ხალხმა გამოგვიგზავნა შეტყობინება, რისი შეგრძნებაც, გარკვეულწილად, თითოეულ ჩვენთაგანს ჰქონდა, რომ ქვეყანაში ბევრი რამე შესაცვლელია. შესაცვლელია სწრაფად, ეფექტურად და თითოეული მოქალაქის ინტერესის გათვალისწინებით. სამწუხაროდ, როგორც ყველა ხელისუფლებას, ჩვენც ძალაუფლების კონცენტრაცია, შეიძლება ითქვას, რომ გადაჭარბებული თვითდაჯერებულობა შეგვმატა და მთელ რიგ შემთხვევებში არ ხდებოდა ადეკვატური კომუნიკაცია საზოგადოებასთან", — აღნიშნა კალაძემ.

მისი თქმით, საზოგადოებისგან გზავნილი მიღებულია და მზად არიან ამ გამოწვევას უპასუხონ.

ამ დროის მონაცემებით, ცესკოს დათვლილი აქვს ხმების 99,97%. მონაცემების მიხედვით, მეორე ტური იმართება, რომელშიც მონაწილეობას ქართული ოცნების მხარდაჭერილი სალომე ზუაბიშვილი (38,64%) და გაერთიანებული ოპოზიციის წარმომადგენელი გრიგოლ ვაშაძე (37,74%) მიიღებენ.