ქართული ოცნების წევრმა, ანრი ოხანაშვილმა მათივე გუნდის მიერ მხარდაჭერილი საპრეზიდენტო კანდიდატი, სალომე ზურაბიშვილი ჟურნალისტებთან მიმართვის გამო გააკრიტიკა.

"ვისურვებდი, რომ სალომე ზურაბიშვილის მხრიდან ჟურნალისტებთან მიმართებით უფრო სწორი კომუნიკაცია იყოს შერჩეული და უფრო მეტი პატივისცემა თქვენს მიმართ", — განაცხადა დეპუტატმა.

მიუხედავად საპრეზიდენტო კანდიდატის კრიტიკისა, ოხანაშვილი ფიქრობს, რომ სალომე ზურაბიშვილის მხარდაჭერა გუნდის მიერ სწორი გადაწყვეტილება იყო.

"როდესაც ჩვენ გადავდივართ და ვაძლიერებთ საპარლამენტო რესპუბლიკას, სადაც პრეზიდენტი უნდა იყოს დამოუკიდებელი, ზეპარტიული პირი, ეს იყო სწორი და საუკეთესო გადაწყვეტილება ამ პრინციპის დაცვით", — ამბობს ქართული ოცნების დეპუტატი.

საქართველოს პრეზიდენტობის კანდიდატი, სალომე ზურაბიშვილი არჩევნების მეორე ტურთან დაკავშირებით არ პასუხობდა ჟურნალისტების დასმულ კითხვებს. 29 ოქტომბერს, როცა ცნობილი გახდა, რომ მეორე ტური გაიმართებოდა, მის სახლთან TV პირველისა და რუსთავი 2-ის ჟურნალისტები მივიდნენ. "არ დაგიბარეთ. როცა დაგიბარებთ, მაშინ გიპასუხებთ", — უთხრა ზურაბიშვილმა ჟურნალისტებს მაშინ.

მმართველი გუნდის მიერ მხარდაჭერილი კანდიდატი, სალომე ზურაბიშვილი მეორე ტურთან დაკავშირებით არჩევნებიდან მესამე დღეს, 30 ოქტომბერს ისაუბრებს.