მმართველი გუნდის მიერ მხარდაჭერილი კანდიდატი, სალომე ზურაბიშვილი მეორე ტურთან დაკავშირებით პირველ განცხადებას არჩევნებიდან მესამე დღეს გააკეთებს.

On.ge-ს სალომე ზურაბიშვილის პრესსამსახურში განუცხადეს, რომ ბრიფინგი მათ საარჩევნო შტაბში, დღეს, 30 ოქტომბერს გაიმართება და პრეზიდენტობის კანდიდატი კითხვებს, სავარაუდოდ, არ უპასუხებს.

საქართველოს პრეზიდენტობის კანდიდატი, სალომე ზურაბიშვილი არჩევნების მეორე ტურთან დაკავშირებით არ პასუხობდა ჟურნალისტების დასმულ კითხვებს. 29 ოქტომბერს, როცა ცნობილი გახდა, რომ მეორე ტური გაიმართებოდა, მის სახლთან TV პირველისა და რუსთავი 2-ის ჟურნალისტები მივიდნენ. "არ დაგიბარეთ. როცა დაგიბარებთ, მაშინ გიპასუხებთ", — უთხრა ჟურნალისტებს მან.

ცესკომ ხმების 100% დაითვალა. მონაცემების მიხედვით, საქართველოში მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება. ცესკომ წინასწარი მონაცემების განახლებული შედეგები რამდენიმე წუთის წინ გამოაქვეყნა.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.