Media.ge-ის რედაქტორი, დავით მჭედლიძე თავის Facebook გვერდზე ვიდეოს აქვეყნებს, სადაც ჩანს, თუ როგორ ძალადობს მასზე უცნობი პირი - მისი ვარაუდით პოლიციის თანამშრომელი. On.ge დაუკავშირდა მჭედლიძეს იმისთვის, რომ მომხდარის დეტალები გაერკვია.

როგორც Media.ge-ის რედაქტორმა გვიამბო, შემთხვევა 18 აგვისტოს, რუსთავში მაშინ მოხდა, როდესაც ის იმ მიტოვებულ შენობაში მივიდა, სადაც სხვადასხვა პირებს ფართის გამო დავა ჰქონდათ:

"მივედი იქ, პოლიცია დამხვდა და ხალხი იყო შეკრებილი. ერთ-ერთ დიდ ოთახში კიდევ იყო პოლიცია - ზოგი ფორმიანი, ზოგი უფორმო. მე შიგნით შესვლა დავაპირე. როდესაც კარი გავაღე, ვუთხარი რომ ჟურნალისტი ვარ და გადაღებას ვაპირებდი, ეგრევე ხელი მკრეს, გამომაგდეს. ამის შემდეგ კამერა ჩავრთე, დავაკაკუნე და გამოვიდა ახალგაზრდაკაცი, ყელში წამიჭირა მკლავი, მეორე ხელით კი კამერის წართმევას ცდილობდა".

მჭედლიძე ამბობს, რომ მიმდებარე ტერიტორიაზე პოლიციის უამრავი თანამშრომელი იმყოფებოდა, რომელთაც მომხდარზე რეაგირება არ მოუხდენიათ. მისი თქმით, როდესაც მან მათ მოძალადის ვინაობა ჰკითხა, მათგან პასუხი ვერ მიიღო.

მჭედლიძემ განმარტა, რომ პროკურატურაში საჩივარი უკვე შეიტანა და ფაქტზე რეაგირებას ელოდება, თუმცა ამ დრომდე უწყებიდან კომენტარი ვერ მივიღეთ.

On.ge ასევე ცდილობს შინაგან საქმეთა სამინისტროსთან დაკავშირებას, თუმცა ამ დრომდე ჩვენს ზარებს არ პასუხობენ. მათი კომენტარებს გარკვევისთანავე შემოგთავაზებთ.