ლეიბორისტული პარტიის პრეზიდენტობის კანდიდატი, შალვა ნათელაშვილი სხვა საპრეზიდენტო კანდიდატებს შორის პირველია, რომელიც საარჩევნო უბანზე მივიდა და საკუთარი არჩევანი დააფიქსირა.

შალვა ნათელაშვილის თქმით, მან არჩევანი გააკეთა იმის მიხედვით, თუ როგორ იცხოვრებენ შვილები ხვალ, ზეგ, მაზეგ, საუკუნის შემდეგ.

"ეს ყველაფერი წყდება დღეს, ჩვენ უნდა გამოვგლიჯოთ ხელიდან საქართველო ისეთ ძალებს, რომლებსაც არაფერი ქვეყნის მართვასთან, პოლიტიკასთან, პროფესიონალურ სახელმწიფო მოღვაწეობასთან არაფერი არ აკავშირებთ და მოხვედრილი არიან შემთხვევით ან ისეთი ქვენა გრძნობებით, რომელსაც მოსდევს ქვეყნის გაუბედურება, ადამიანის გაღატაკება, იმედების მსხვრევა, მომავლის უქონლობა", — განაცხადა შალვა ნათელაშვილმა ხმის მიცემის შემდეგ.

საქართველოს მეხუთე პრეზიდენტის ასარჩევად არჩევნები დაიწყო. საარჩევნო უბნები საქართველოში რვა საათზე გაიხსნა და პირველი ამომრჩეველიც დაფიქსირდა.

ცენტრალური საარჩევნო კომისიის ინფორმაციით, არჩევნები 3 703 უბანზე ტარდება. მათ შორის 55 საზღვარგარეთ, 11 კი საგამონაკლისო წესით შექმნილი უბანია. ცესკოში ამბობენ, რომ ამომრჩეველთა საერთო რაოდენობა 3 518 877 ადამიანს შეადგენს, რომელშიც შედის საზღვარგარეთ რეგისტრირებული 14 795 მოქალაქე.

საკუთარი არჩევანი უკვე დააფიქსირეს ევროპული საქართველოს პრეზიდენტობის კანდიდატმა, დავით ბაქრაძემ, საქართველოს პრემიერ-მინისტრმა მამუკა ბახტაძემ, ასევე შს მინისტრმა გიორგი გახარიამ და ნაციონალური მოძრაობის ერთ-ერთმა ლიდერმა ნიკა მელია.