შინაგან საქმეთა სამინისტროს ინფორმაციით, გორში დაკარგული ცხრა წლის გოგოს ცხედარი მდინარე ლიახვის ნაპირთან იპოვეს. მათივე თქმით, მომხდარ ფაქტზე გამოძიება სპეციალურმა საგამოძიებო ჯგუფმა დაიწყო, რომელსაც შინაგან საქმეთა მინისტრის პირველი მოადგილე, კახა საბანაძე ხელმძღვანელობს.

ადგილზე, სამართალდამცველებთან ერთად, შიდა ქართლის გუბერნატორი, გიორგი ხოჯევანიშვილი და ადგილობრივი ხელისუფლების სხვა წარმომადგენლები იმყოფებიან. ამ დროისთვის ადგილზე ექსპერტ-კრიმინალისტები მუშაობენ. ცხედარს კომპლექსური ექსპერტიზა ჩაუტარდება.

გამოძიება სისხლის სამართლის კოდექსის 109-ე მუხლის მე-2 ნაწილის "ბ" ქვეპუნქტით მიმდინარეობს, რაც წინასწარი შეცნობით არასრულწლოვნის მიმართ დამამძიმებელ გარემოებაში ჩადენილ განზრახ მკვლელობას გულისხმობს.

გოგო 25 ოქტომბერს შუადღით ცეკვის გაკვეთილზე წავიდა და მას შემდეგ აღარვის უნახავს. როგორც ოჯახის წევრები ამბობენ, გარდაცვლილს ხელ-ფეხი მავთულით აქვს შეკრული. გარდა ამისა, გოგოს სამძებრო სამუშაოებში ჩართული მოქალაქეები ყვებიან, რომ იმ ადგილას, სადაც ცხედარი იპოვეს, აქამდე საეჭვო არაფერი შეუნიშნავთ და ეჭვობენ, რომ იქ ცხედარი მოგვიანებით მიიტანეს.