მმართველი პარტიის მხარდაჭერილმა კანდიდატმა, სალომე ზურაბიშვილმა საპრეზიდენტო დებატების დროს გაერთიანებული ოპოზიციისა და ევროპული საქართველოს კანდიდატს ჰკითხა რითი განსხვავდებიან ისინი ერთმანეთისგან.

"თქვენ რა განგასხვავებთ, ორი ძალა ხართ თუ ერთი? მე როდესაც განვაცხადე, რომ ერთი ძალის ორი სახე უნდა მოსულიყო, მობრძანდით, გამოვარდით ორივე", — განაცხადა ზურაბიშვილმა.

პასუხად ევროპული საქართველოს საპრეზიდენტო კანდიდატმა, დავით ბაქრაძემ ოპონენტისგან კორექტულობა მოითხოვა და აღნიშნა, რომ მსგავსი ტერმინებით კანდიდატებს არ უნდა მიმართოს. მისივე თქმით, ხალხი თავად გადაწყვეტს რითი განსხვავდება გაერთიანებული ოპოზიციის კანდიდატისგან.

"მე გეტყვით იმას, პირველ რიგში, რა განგვასხვავებს თქვენგან. განგვასხვავებს ის, რომ ქვეყანაში გვინდა ცვლილება და ვხედავთ ძალიან ბევრ გაჭირვებულ ადამიანს", — აღნიშნა ბაქრაძემ.

მიმართვის ფორმაზე ზურაბიშვილს შენიშვნა მისცა გაერთიანებული ოპოზიციის კანდიდატმა, გრიგოლ ვაშაძემაც. თუმცა, ვაშაძემ პასუხად ზურაბიშვილი "ქურდული ოცნების" წევრად მოიხსენია.

ზურაბიშვილმა ოპონენტების პასუხები შეაფასა და აღნიშნა, რომ მისთვის გასაკვირია, რატომ მოუწოდებენ ისინი ზდილობისკენ. ზურაბიშვილის თქმით, ამ კანდიდატებმა საარჩევნო პერიოდში ყველაზე უხეში ფორმებით გამოხატეს აზრი მის წინააღმდეგ.

"ამ შავი ძალის ორივე მხარეს ვიწვევ დებატებზე", — ასე გამოიწვია გრიგოლ ვაშაძე და დავით ბაქრაძე დებატებში სალომე ზურაბიშვილმა 28 სექტემბერს.