მმართველი პარტიის, ქართული ოცნების მიერ მხარდაჭერილმა საპრეზიდენტო კანდიდატმა სალომე ზურაბიშვილმა ოპონენტები დებატებში გამოიწვია. მან ამის შესახებ დღეს, 28 სექტემბერს გამართულ ბრიფინგზე თქვა. სალომე ზურაბიშვილი მიიჩნევს, რომ მის წინააღმდეგ გაჟღერებულ "ცილისწამებასა" და "შავ პიარს" ამ მეთოდით უნდა გასცეს პასუხი:

"ბევრი ვიფიქრე და გამომდინარე იმისგან, რომ მე საზოგადოებას პატივს ვცემ, ამომრჩევლებს პატივს ვცემ, ჩავთვალე, რომ მე უნდა გადავლახო ყველაზე ძლიერი განცდა, რაც მაკავშირებს ამ ქვეყანასთან, ავიღო ინიციატივა და ვთქვა, რომ ამ შავი ძალის ორივე მხარეს ვიწვევ დებატებზე, მივიღებ მონაწილეობას ნეიტრალურ სივრცეში რათა დავაფიქსირო ჩემი პოზიციები".

ზურაბიშვილმა განაცხადა, რომ საარჩევნო კამპანია სიცრუეზე და სიყალბეზეა აგებული:

"ყველაზე მიუღებელია არა ის ბრალდებები და შეურაცხყოფა, რაც ჩემ წინააღმდეგაა, არამედ ის, რაც ეხება ჩემს დამოკიდებულებას ამ ქვეყანასთან, რომელიც წარმოადგენს ჩემთვის ერთგვარ წითელ ხაზს".

2008 წლის აგვისტოს ომის დაწყების შესახებ სალომე ზურაბიშვილის განცხადების შემდეგ ოპონენტები მას "სამშობლოს ღალატში" ადანაშაულებენ და მოუწოდებენ ამომრჩეველს, ნუ მისცემენ ხმას ოქტომბრის არჩევნებზე.

გაიგეთ მეტი სალომე ზურაბიშვილის განცხადებებზე: