37 წლის ედიშერ სიგუა მარტვილის პოლიციას ძალადობასა და არაადამიანურ მოპყრობაში ადანაშაულებს. დაზარალებული კურიერთან აცხადებს, რომ ის ნასვამ მდგომარეობაში დააკავეს და ჯერ გზაში, შემდეგ კი უკვე პოლიციის განყოფილებაში ფიზიკურად გაუსწორდნენ.

ედიშერ სიგუა ასახელებს მარტვილის პოლიციის უფროსის მოადგილეს, თორნიკე შულაიას, რომელიც მისი თქმით, სამ სხვა თანამშრომელთან ერთად სცემდა. სიგუას განმარტებით, ცემისას მან გონება დაკარგა, რის შემდეგაც საავადმყოფოში გადაიყვანეს.

საქართველოს პროკურატურაში On.ge-ს განუცხადეს, რომ ედიშერ სიგუასა და სამართალდამცავებს შორის მომხდარ ინციდენტთან დაკავშირებით, სამეგრელო ზემო-სვანეთის საოლქო პროკურატურამ გამოძიება 2018 წლის 22 ოქტომბერს დაიწყო. მარტვილის რაიონის პოლიციის დროებითი მოთავსების იზოლატორიდან მიღებული შეტყობინებით საქმე აღიძრა საქართველოს სისხლის სამართლის კოდექსის 333-ე მუხლით, რაც სამსახურებრივი უფლებამოსილების გადამეტებას გულისხმობს.

შინაგან საქმეთა სამინისტროს ცნობით, პოლიციამ ედიშერ სიგუა ადმინისტრაციულ სამართალდარღვევათა კოდექსის 173-ე მუხლის შესაბამისად დააკავა, რაც პოლიციელის კანონიერი მოთხოვნის დაუმორჩილებლობას გულისხმობს. უწყების ინფორმაციით, სენაკის რაიონულმა სასამართლომ ის 1000 ლარით დააჯარიმა.