საპრეზიდენტო არჩევნების მოახლოებასთან ერთად წინასაარჩევნო გარემო იძაბება. მიუხედავად იმისა, რომ კანდიდატები აქტიურად ხდებიან ამომრჩეველს და საკუთარ პროგრამებს აცნობენ, ხშირად პასუხგაუცემელი რჩება ყველაზე მარტივი კითხვები. მათ შორისაა ის თუ რატომ სურთ მათ პრეზიდენტობა და რა მიაჩნიათ პრეზიდენტის ყველაზე დიდ ამოცანად.

ამ კითხვის პასუხებს Prezidenti.ge აქვეყნებს, სადაც 5 საპრეზიდენტო კანდიდატის საარჩევნო პროგრამა და ხედვებია გამოქვეყნებული.

რა გესახებათ თქვენი, როგორც საქართველოს პრეზიდენტის ყველაზე დიდ ამოცანად?

შალვა ნათელაშვილი

კითხვაზე ყველაზე მოკლე პასუხი ყველაზე დიდი გამოცდილების მქონე საპრეზიდენტო კანდიდატს, ლეიბორისტული პარტიის წარმომადგენელს, შალვა ნათელაშვილს აქვს. ნათელაშვილს პრეზიდენტის ამოცანად ქვეყნის პოლიტიკური დეოლიგარქიზაცია მიაჩნია.

დავით ბაქრაძე

ევროპული საქართველოს საპრეზიდენტო კანდიდატი ამ კითხვას მოსახლეობის პრობლემებზე საუბრით პასუხობს. ბაქრაძეს მიაჩნია, რომ სახელისუფლებო გუნდმა ქვეყანაში ეკონომიკური ფონი გააუარესა და პრეზიდენტის ამოცანაა მისი გამოსწორება.

"მოქალაქეთა უიმედობის დაძლევა და ხვალინდელ დღის პერსპექტივის რწმენის გაღვივება", — ბაქრაძის თქმით, სწორედ ეს არის პრეზიდენტის პირველი ამოცანა.

ბაქრაძე ამბობს, რომ მომავალი პრეზიდენტი არა კაბინეტის, არამედ ხალხის პრეზიდენტი უნდა იყოს.

გრიგოლ ვაშაძე

ვაშაძე ამ კითხვის პასუხად არა პრეზიდენტის ამოცანაზე, არამედ მისი გუნდის მიზნებზე საუბრობს. ვაშაძის თქმით, გაერთიანებული ოპოზიციის მიზანია შექმნან ცოდნის ეკონომიკაზე დაფუძნებული თავისუფალი მოქალაქეების სახელმწიფო, სადაც ყველა ადამიანი იქნება თანასწორი და სადაც მოქალაქის უფლებების დაცვა, განათლება პრიორიტეტულია.

ვაშაძეს მიაჩნია, რომ უნდა შეიქმნას ისეთი ქვეყანა, სადაც, უსაფრთხო გარემოში, ამომრჩეველი ჩართული იქნება ქვეყნის მმართველობაში და მცირე მთავრობა მოქალაქეს მოემსახურება.

ზურაბ ჯაფარიძე

პარტია გირჩის საპრეზიდენტო კანდიდატი, ზურაბ ჯაფარიძე კი მიიჩნევს, რომ პრეზიდენტს აქვს უმაღლესი ტრიბუნა საზოგადოებრივ აზრზე სამოქმედოდ და ის აქტიურად უნდა გამოიყენოს. ჯაფარიძის აზრით ქვეყნის უმაღლესი მთავარსარდლის მთავარი ამოცანებია:

• ქვეყნის თავდაცვისუნარიანობაზე და უსაფრთხოებაზე ზრუნვა;
• საერთაშორისო პარტნიორებთან თანამშრომლობაზე დროის დახარჯვა;
• თავისუფლების შემზღუდავ კანონებზე ვეტოს დადება;
• პრეზიდენტის ტრიბუნის გამოყენება მნიშვნელოვანი პრობლემური საკითხების წინ წამოსაწევად, მასზე მსჯელობის გასამართად და გადასაწყვეტად.

დავით უსუფაშვილი

შენების მოძრაობის კანდიდატს, დავით უსუფაშვილს მიაჩნია, რომ პრეზიდენტი საჭიროა, რადგან საქართველოს სჭირდება ნაბიჯები სახელმწიფოს შესაკვრელად, საზოგადოების მოსაწესრიგებლად, ქვეყნის დასალაგებლად.

უსუფაშვილის აზრით, სახელმწიფოს მეთაურს ბევრი ამოცანა აქვს. მათ შორის:

• სახელმწიფოებრიობის შეუქცევადობის უზრუნველყოფა;
• საქართველოს ტერიტორიაზე ქართული სახელმწიფოებრიობის თანაბარი გავრცელება, განმტკიცება და გაძლიერება;
• ეროვნულ-სახელმწიფოებრივი თავმოყვარეობის და თვითრწმენის აღდგენა და განმტკიცება;
• წერა-კითხვის გამავრცელებელი საზოგადოების, 1918-21 წლების დემოკრატიული საქართველოს და 1980-იანი წლების ეროვნულ-განმათავისუფლებელი მოძრაობის სულისკვეთების აღორძინება;
• საკუთარ შესაძლებლობებში დარწმუნებული საზოგადოების დემოკრატიული მოდერნიზაციის ხელშეწყობა;
• ინდივიდუალური, ეროვნული და სახელმწიფოებრივი წარმატების მომტანი „მუდმივად მეტი შესაძლებლობების" დოქტრინის რეალიზება, ანუ ქვეყნის, ოჯახის და პიროვნების ნაბიჯ-ნაბიჯ, რაციონალური, დაგეგმილი განვითარება.

Prezidenti.ge-ს ვებგვერდზე არ არის გამოქვეყნებული ხელისუფლების მიერ მხარდაჭერილი საპრეზიდენტო კანდიდატის, სალომე ზურაბიშვილის ხედვები.

ვინაიდან ბოლო არჩეული პრეზიდენტის უფლებამოსილებები კონსტიტუციით იზღუდება, კანდიდატების მიერ მიჩნეული ამოცანების ნაწილი პრეზიდენტის ვალდებულებებში აღარ შედის, ნაწილი კი არც აქამდე შედიოდა.