ხორავას ქუჩაზე მოკლულის, დავით სარალიძის მამა, ზაზა სარალიძე კურიერის მიერ გასაჯაროვებულ ფარულ აუდიოჩანაწერებს ეხმაურება, რომლის მიხედვითაც დავით სარალიძის მკვლელობის საქმის მოწმეს გარკვეული ინფორმაციების დამალვის სანაცვლოდ თანხა გადაუხადეს.

ზაზა სარალიძე კურიერთან საუბრისას აცხადებს, რომ მოწმე, რომელზეც ჩანაწერებშია საუბარი, მთავარ პროკურატურაში შალვა თადუმაძის დანიშვნამდე, უცხო პირის სახელით დაუკავშირდა და შეხვედრის სურვილი გამოთქვა.

სარალიძის თქმით, მან მიმართა შინაგან საქმეთა სამინისტროს და აცნობა ფაქტის შესახებ, რათა მოწმის მოსყიდვა არ დაებრალებინათ.

"15 ივლისს, როდესაც პროკურატურას გადაეგზავნა ეს ჩემი განაცხადი, ორშაბათს ეს ბავშვი გადაიკეტა. პროკურატურამ გასცა ეს ინფორმაცია, რომ ვაპირებდი ამ ბავშვთან შეხვედრას და აპირებდნენ ფარულ ჩაწერას, რას ისაუბრებდა ბავშვი და პროკურატურამ ეს საქმე გაყიდა, ასე რომ ვთქვათ",— განაცხადა სარალიძემ.

მისი თქმით, დარწმუნებულია, რომ ზეწოლა მიმდინარეობს არამარტო ამ ბავშვზე, არამედ ყველა მოწმეზე გამოძიების დაწყების პირველივე დღიდან.

"ზოგზე ზეწოლა მიმდინარეობდა, ზოგი მართლაც სცემეს, რასაც პირდაპირ ადასტურებს მიხეილ კალანდია თავის ჩვენებაში, რომ გვერდით ოთახში მამაჩემს სცემდნენო და ჩემს ცემასაც აპირებდნენო" — განაცხადა ზაზა სარალიძემ.

მისი თქმით, თავდაპირველად საქმის ფალსიფიცირება მირზა სუბელიანის დავალებით დაიწყო, უკვე ერთ თვეში საქმე იმდენად დამძიმდა, რომ პროკურატურამ უკან დახევა ვეღარ შეძლო.

ხორავას ქუჩის საქმის ერთ-ერთი მოწმის გ.მ.-ს ადვოკატი, დავით დადიანი აცხადებს, რომ მოწმეზე ზეწოლა არ განხორციელებულა და მას ჩვენება არ შეუცვლია.

"პირველივე დღიდან ანალოგიური ჩვენებას აძლევს. ერთი და იგივეა პირველი ჩვენებაც და ბოლო ჩვენებაც და საიდან მოვიდა ეს ამბავი, ჩემთვის აბსოლუტურად გაუგებარია", — განაცხადა დავით დადიანმა.

ტელეკომპანია რუსთავი 2-მა, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის მონაწილეობით კიდევ ერთ აუდიოჩანაწერი გაავრცელა. ჩანაწერის ერთ-ერთ ფრაგმენტში, სავარაუდოდ, დავით ცუხიშვილი ამბობს, რომ ხორავას ქუჩის საქმეზე ერთ-ერთი მოწმე ათი ათასით მოისყიდა.