ტელეკომპანია რუსთავი 2-მა, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის მონაწილეობით კიდევ ერთ აუდიოჩანაწერი გაავრცელა. აუდიოჩანაწერში, რომლის ავთენტურობაც ჯერ დადასტურებული არ არის, სავარაუდოდ, სუბელიანის გარდა დეპუტატი ვიქტორ ჯაფარიძე და ლტოლვილთა სამინისტროს ყოფილი მაღალჩინოსანი დავით ცუხიშვილი ფიგურირებენ.

ჩანაწერის ერთ-ერთ ფრაგმენტში, სავარაუდოდ, დავით ცუხიშვილი ამბობს, რომ ხორავას ქუჩის საქმეზე ერთ-ერთი მოწმე ათი ათასით მოისყიდა.

ცუხიშვილი: ჩავაგდე "დესიტ ტისიჩი" ეკლესიაში, შესაწირში და ჩვენება შეიცვალა.

სუბელიანი: მამაოს [დეკანოს შიო მენაბდე] შვილზეა საუბარი.

ცუხიშვილი: ჰო, მამაოს შვილს ჩავუგდეთ "დესიტ ტისიჩი". ბიძა მაგის, ბრალდებულის ბიძა ამერიკაშია, მილიონერია. ჩვენ, მთელი მამაოები, რა ვიცი თუ ვინმე მამაო ავტორიტეტი იყო და ქუჩის ბიჭები და ყველა, ამან დაუბრუნა ეს ათი ათასი და თავის შვილს ჩვენება შეაცვლვევინა. ათი ათასი ჩაუგდეს, რომ ჩვენება შეეცვალა.

რუსთავი 2 ამტკიცებს, რომ ხორავას ქუჩის საქმეზე მირზა სუბელიანი მითითებებს აძლევდა, თბილისის ყოფილ პროკურორს მიხეილ შაყულაშვილს.

პარლამენტის საგამოძიებო კომისიაში დაკითხვის დროს მიხეილ შაყულაშვილმა თქვა, რომ ხორავას ქუჩაზე ინციდენტის შემდეგ მირზა სუბელიანმა მას დაურეკა. რუსთავი 2-ის ინფორმაციით, მირზა სუბელიანის გამოკითხვის ოქმის მიხედვით, ის შაყულაშვილთან საუბარს არ ადასტურებს.

რუსთავი 2-ის მტკიცებით, მათ მოიპოვეს, სავარაუდოდ, მირზა სუბელიანისა და ვიქტორ ჯაფარიძის სატალეფონო საუბრის აუდიოჩანაწერი, რომელშიც სუბელიანი შაყულაშვილზეა გაბრაზებული, რადგან ჩვენების შინაარსი შეთანხმებული არ იყო.

სუბელიანი: სიმართლე მელაპარაკა-მეთქი? ვიცოდი რა უნდა მელაპარაკა?

ჯაფარიძე: ერთი წუთით მოისმინე რა...

სუბელიანი: გისმენ როგორი მოსასმენია...

ჯაფარიძე: გავაგზავნეო დათო და ვუთხარიო, რო მიდი და უთხარიო, რომ ის ამას ამბობს, რომ აზრი არ აქვს მაგ შეხვედრის დამალვას, ის შემხვდა და მოგვეხმარაო და ვთქვათ მაგიო და ეგ მაინტერესებს დათომ რატო არ გითხრა.

სუბელიანი: ...ტექსტის შინაარსში რა პრობლემა იყო, რომ ეთქვათ, მე რა ვიცი რა უნდა ვილაპარაკო და არ ვილაპარაკო. ვილაპარაკო? მაგის თქმა გინდა?

რუსთავი 2-ის მიერ გავრცელებულ ჩანაწერებში, სავარაუდოდ, მირზა სუბელიანი ისევ იმეროებს, რომ მისთვის მიცემული პირობა დაარღვიეს და მას სხვა ადამიანებზე კომპრომატები აქვს.