მას შემდეგ, რაც ცუდი ხილვადობის გამო გუშინ საღამოს ზღვაში დაკარგული სამხედროების ძებნა შეწყდა, დღეს სამძებრო სამუშაოები დილიდან განახლდა. სამუშაოებში ჩართულია როგორც ქართული სამსახურები, ისე თურქული და ამერიკის ევროპული სარდლობის სპეციალური დანიშნულების ძალები.

შეიარაღებული ძალების სამხედრო პოლიციის დეპარტამენტის უფროსის, სერგო ძაგნიძის განმარტებით, რა ძალებიც იყო მობილიზებული გუშინ, დღესაც იგივე ძალები მუშაობენ და მათ კიდევ თურქული მცურავი საშუალებები დაემატათ:

"თურქული მხარეა ჩართული ძალიან აქტიურად და ერთობლივად ვაგრძელებთ მუშაობას".

ზღვაში ორი სამხედრო მოსამსახურის, იაგო შარაძისა და გიორგი ნანიტაშვილის პოვნა კვლავ ვერ ხერხდება. მათ ამ დრომდე მყვინთავთა რამდენიმე ჯგუფი ეძებს. გონიოში საზღვაო ზოლში იმყოფებიან სამხედრო პოლიციისა და გენერალური ინსპექციის წარმომადგენლები. საქმეში ჩართულია ავიაციაც.

საქართველოს თავდაცვის სამინისტროს განცხადებით, საწვრთნელი ვარჯიშის დროს, ზღვაში სიღრმითი ჩაყვინთვის შემდეგ, გიორგი ნანიტაშვილმა და იაგო შარაძემ ვერ შეძლეს ზღვის ზედაპირზე ამოსვლა და ამ დრომდე მათი ადგილსამყოფელი დაუდგენელია.