სახალხო დამცველმა, ნინო ლომჯარიამ ხონის მუნიციპალიტეტში, სოფელ ქუტირში მდებარე ფსიქიკური ჯანმრთელობის ცენტრში არსებულ მდგომარეობას "სავალალო" და "ღირსების შემლახავი" უწოდა.

ომბუდსმენმა დაწესებულება 17 ოქტომბერს მოინახულა. მისი შეფასებით, საცხოვრებელი ოთახების უმეტესობა ჰიგიენის მინიმალურ ნორმებსაც კი ვერ აკმაყოფილებს:

"ამორტიზებული შენობა, ჩამოყრილი ბათქაში, ჩამსხვრეული მინები, მორყეული კარ–ფანჯარა, მოუწესრიგებელი სველი წერტილები და სხვა ინფრასტრუქტურული პრობლემები მთლიანი დაწესებულების, განსაკუთრებით კი თავშესაფრის მომსახურებით მოსარგებლე ბენეფიციარებს ადამიანის ღირსების შემლახავ პირობებში ამყოფებს".

ქუტირის ფსიქიკური ჯანმრთელობის ეროვნული ცენტრი 600 პაციენტზეა გათვლილი. ომბუდსმენის ცნობით, დაწესებულებაში ისევ პრობლემად რჩება სომატური დაავადებების დროული და ადეკვატური მკურნალობის ხელმიუწვდომლობა, ხანგრძლივი ჰოსპიტალიზაცია და არანებაყოფლობითი სამედიცინო ინტერვენცია.

"პაციენტთა გარკვეული ნაწილი არ საჭიროებს აქტიურ მკურნალობას, მაგრამ წლების განმავლობაში იმყოფება სტაციონარში, მხოლოდ იმიტომ, რომ "წასასვლელი არ აქვს", — აცხადებს ომბუდსმენი და განმარტავს, რომ ამის ძირითადი მიზეზებია გაწერილი პაციენტის მხარდამჭერი სისტემის არარსებობა, მატერიალური დაუცველობა და ხანგრძლივი მოვლის დაწესებულების არარსებობა.

სახალხო სამცველის ინფორმაციით, ქუტირის ფსიქიკური ჯანმრთელობის ეროვნული ცენტრის ტერიტორიაზე უკვე მიმდინარეობს სარეაბილიტაციო სამუშაოები და 100 ბენეფიციარზე გათვლილი საცხოვრებელი ნაწილი გარემონტებულია.

სახალხო დამცველი მოუწოდებს ჯანდაცვის სამინისტროს დაუყოვნებლივ შეიმუშაოს და განახორციელოს ფსიქიატრიული დაწესებულებების დეინსტიტუციონალიზაციის სტრატეგია.