ფაშისტური მოძრაობის, საქართველოს ეროვნული ერთობის ლიდერს, გიორგი ჭელიძეს მინიმუმ 15 ადვოკატი იცავს. ამის შესახებ მისმა ადვოკატმა, გელა ტყეშელაშვილმა ჭელიძის პროცესის დაწყებამდე განაცხადა.

ჭელიძის სასამართლო პროცესი თბილისის საქალაქო სასამართლოში იმართება. ადვოკატები აცხადებენ, რომ მათი რიცხვი, შესაძლოა, კიდევ გაიზარდოს. მათი თქმით, დარბაზში ვერ ეტევიან, ამიტომ დიდ დარბაზს ითხოვენ.

ერთ-ერთი ადვოკატის თქმით, ადვოკატების რეკორდული რაოდენობის მიზეზი მაღალი საზოგადოებრივი ინტერესია, რადგან ჭელიძის დაკავებით ეროვნულობას საფრთხე ექმნება.

პროცესის დაწყებამდე სასამართლოს ეზოში აქცია გაიმართა. ფაშისტური მოძრაობის წევრებმა და გიორგი ჭელიძის მხარდამჭერებმა განაცხადეს, რომ ის პოლიტიკური პატიმარია და მისი დაუყოვნებლივ გათავისუფლება მოითხოვეს. მათ მიაჩნიათ, რომ ჭელიძის უფლებები ირღვევა.

გიორგი ჭელიძე ცეცხლსასროლი იარაღის და საბრძოლო მასალის მართლსაწინააღმდეგო შეძენა-შენახვა-ტარების ბრალდებით დააკავეს. 3 სექტემბერს თბილისის საქალაქო სასამართლომ, გიორგი ჭელიძეს აღკვეთის ღონისძიების სახით პატიმრობა შეუფარდა.

მიმდინარე წლის 31 აგვისტოს, სამართალდამცველებმა გამოძიება სოციალურ ქსელში მოძრაობა საქართველოს ეროვნული ერთობის გვერდზე გავრცელებული ვიდეოს საფუძველზე დაიწყეს. ვიდეოში, რომელიც ფაშისტურმა დაჯგუფებამ სოციალურ ქსელში გაავრცელა, ჩანს თუ როგორ ვარჯიშობენ იარაღის სროლაში ორგანიზაციის აქტივისტები.

შინაგან საქმეთა სამინისტოს განცხადებით, პოლიციამ ბრალდებულის საცხოვრებელი ბინის ჩხრეკისას სხვადასხვა ტიპის იარაღი და 28 ვაზნა ნივთმტკიცებად ამოიღო.

ჭელიძის დაკავების შემდეგ ფაშისტური მოძრაობის ფეისბუქგვერდი წაიშალა. სწორედ აღნიშნულ გვერდზე გამოქვეყნებული ვიდეოების საფუძველზე დაიწყო შსს-მ გამოძიება.