პარლამენტის თავმჯდომარე, ირაკლი კობახიძე მიიჩნევს, რომ არასამუშაო დღეს, კვირას, 14 ოქტომბერს დეპუტატ ვიქტორ ჯაფარიძისთვის ნებართვის გაცემით კანონი არ დარღვეულა. ის ჟურნალისტებთან საუბრისას ამის მიზეზებს არ აკონკრეტებს:

"ხუთი ბრძანებაა გაცემული, ხუთივე მოხდა რეგლამენტის შესაბამისად".

ირაკლი კობახიძის თქმით, როდესაც დეპუტატები მიმართავენ პარლამენტის თავმჯდომარეს, თავმჯდომარე ამოწმებს მხოლოდ უსაფრთხოების საკითხებს.

ვიქტორ ჯაფარიძე მირზა სუბელიანთან ციხეში იმ დღეს შევიდა, როცა რუსთავი 2-მა მათი აუდიოჩანაწერის P.S.-ში გასვლა დააანონსა. ჩანაწერის სრული ვერსია იმავე საღამოს, კვირას, 14 ოქტომბერს გავიდა ეთერში.

ხორავას ქუჩის საქმეზე, დანაშაულის შეუტყობინებლობისთვის ბრალდებულ სუბელიანს ჯაფარიძე შაბათს, 6 ივლისს, 20 ივლისს, 10 სექტემბერსა და 11 ოქტომბერს შეხვდა.

შესაბამისი დოკუმენტები On.ge-ს პარლამენტის აპარატმა მიაწოდა. ხუთივე ბრძანებაში, რომელსაც პარლამენტის თავმჯდომარე, ირაკლი კობახიძე აწერს ხელს, შესვლის მიზეზად მითითებულია, ბრალდებულ მირზა სუბელიანის მონახულება, მისი პრობლემისა და მდგომარეობის მონიტორინგი.

16 ოქტომბერს, ტელეკომპანია რუსთავი 2-ის მიერ, სავარაუდოდ, მირზა სუბელიანის აუდიოჩანაწერის გავრცელების შემდეგ პროკურატურამაც სხვა ჩანაწერი გაასაჯაროვა.