საქართველოს პარლამენტის დეპუტატი ვიქტორ ჯაფარიძე მირზა სუბელიანთან ციხეში პარლამენტის თავმჯდომარის ბრძანებით იმ დღესაც შევიდა, როცა რუსთავი 2-მა მათი აუდიოჩანაწერის P.S.-ში გასვლა დააანონსა. ჩანაწერის სრული ვერსია იმავე საღამოს, კვირას, 14 ოქტომბერს გავიდა ეთერში.

დეპუტატი ადასტურებს, რომ პარლამენტის თავმჯდომარისგან მიღებული ნებართვა გამოიყენა და სუბელიანი ციხეში 14 ოქტომბერს მართლაც მოინახულა. კითხვაზე, რატომ იყო შესული პატიმართან მაშინ, როცა მათი აუდიოჩანაწერი დაანონსდა, On.ge-ს არ უპასუხა და ტელეფონი გათიშა.

საქართველოს პარლამენტის თავმჯდომარემ თავისივე თანაპარტიელს ციხეში შესვლის ნებართვა 5-ჯერ მისცა. ბრძანებები, რომლებსაც პარლამენტის თავმჯდომარის, ირაკლი კობახიძის ხელმოწერა აქვს, On.ge-ს საქართველოს პარლამენტის აპარატმა მიაწოდა.

ტელეკომპანია რუსთავი 2-ის მიერ, სავარაუდოდ, მირზა სუბელიანის აუდიოჩანაწერის გავრცელების შემდეგ დღეს, 16 ოქტომბერს პროკურატურამაც სხვა ჩანაწერი გაასაჯაროვა.