ფინანსური პრობლემების მიზეზით ტელეკომპანია იბერიას საინფორმაციო პროგრამები შეაჩერა. დღეს, 16 ოქტომბერს ეთერში არ გასულა მთავარი საინფორმაციო გამოშვება და არ გავა პოლიტიკური ტოქ-შოუ თავისუფალი სივრცე.

"ხელისუფლებამ მიაღწია იმას, რასაც აგერ ორი წლის განმავლობაში აკეთებდა და ემზადებოდა ამ დღისთვის და რასაც აგვისტოდან ხმამაღლა საუბრობდა იბერიაც და ომეგა ჯგუფიც. ძალიან სამწუხაროა ეს ვითარება, მაგრამ სამწუხაროა ეს, არა მხოლოდ იბერიასთვის, არამედ ქვეყნისთვის, რადგან, როდესაც ასეთი მეთოდებით ებრძვი მედიას, ეს არასდროს სასიკეთოდ არ აისახება ხოლმე ხელისუფლების მოქმედებაზე", — აღნიშნა იბერიას დამფუძნებელმა, დეპუტატმა ნატო ჩხეიძემ რუსთავი 2-თან საუბრისას.

ტელეკომპანია ხელისუფლების მხრიდან ფინანსურ ზეწოლაზე რამდენიმე თვეა საუბრობს და აცხადებს, რომ მათი მთავარი წყაროს, ომეგა ჯგუფს პრობლემებს უქმნიდა. საქართველოს ფინანსთა სამინისტროში კი აცხადებენ, რომ ომეგა ჯგუფის საბიუჯეტო დავალიანება 51 მილიონ ლარს აღემატება.