სახალხო დამცველმა ნინო ლომჯარიამ მირზა სუბელიანი ციხეში მოინახულა. როგორც ომბუდსმენი ამბობს, მან ჩანაწერებთან დაკავშირებით კითხვები დაუსვა, თუმცა სუბელიანმა ამ თემაზე საუბარი არ ისურვა. ლომჯარიას განცხადებით, სუბელიანმა შეხვედრისას ძირითადად ხორავას ქუჩის საქმეზე ისაუბრა. მისი თქმით, სუბელიანი მოზარდების მკვლელობის საქმეს ძალიან განიცდის და ოჯახებს თანაუგრძნობს.

"როდესაც გავრცელდა ჩანაწერი მისი მონაწილეობით, ამას მოჰყვა გუშინ საღამოს თვითმკვლელობის მცდელობა მისი მხრიდან. ჩემი აქ მოსვლის მიზანიც იყო ის, რომ დამედგინა მისი ჯანმრთელობის მდგომარეობა, რა ზომები იქნა გატარებული, რამდენად არის დაცული მისი სიცოცხლე და უსაფრთხოება და რა თქმა უნდა, შევთავაზე სახალხო დამცველის დახმარება", — ამბობს ნინო ლომჯარია.

პენიტენციური სამსახური ადასტურებს, რომ ხორავას ქუჩაზე დანაშაულის შეუტყობინებლობისთვის დაკავებულმა მირზა სუბელიანმა თვითმკვლელობა სცადა. ინფორმაცია უწყებამ მას შემდეგ გაავრცელა, რაც დაკავებულის ადვოკატებმა მედიასთან ისაუბრეს.

მირზა სუბელიანის თვითმკვლელობის მცდელობას წინ უსწრებდა რუსთავი 2-ის მიერ მისი შესაძლო მონაწილეობით აუდიოჩანაწერების გავრცელება. აუდიოჩანაწერების მოსმენის შემდეგ მმართველი პარტია დადგმულ სერიალზე საუბრობდა, ოპოზიცია კი სისტემურ დანაშაულზე.

გაიგეთ მეტი:

მირზა სუბელიანის აუდიოჩანაწერი