საქართველოს პროკურატურამ "მირზა სუბელიანის ფარული ჩანაწერების" საქმეზე გამოძიების ფარგლებში მოპოვებული ახალი აუდიოჩანაწერი გაავრცელა. პროკურატურის ცნობით, სასჯელაღსრულებით დაწესებულებაში კანონდარღვევით სულ სამი ჩანაწერი განხორციელდა.

გამოძიების ცნობით, იმ პირის მეხსიერების ბარათიდან, რომელსაც პროკურატურის ვერსიით ციხეში ჩანაწერების გაკეთება აიძულეს, სულ სამი ჩანაწერია ამოღებული, მათგან ერთი, 11 ოქტომბრით დათარიღებული აუდიოფაილი რუსთავი 2-მა უკვე გაასაჯაროვა.

საგამოძიებო უწყების ცნობით, ვინაიდან რუსთავი 2-მა ერთი ჩანაწერი უკვე გაასაჯაროვა, ისინი მეორე ჩანაწერს გაასაჯაროებენ, რომელშიც ქართული ოცნების დეპუტატი, ვიქტორ ჯაფარიძე და მირზა სუბელიანი საუბრობენ.

"მაღალი საზოგადოებრივი ინტერესის გათვალისწინებით, მივიღეთ გადაწყვეტილება, გავასაჯაროვეთ 2018 წლის 6 ივლისით დათარიღებული აუდიომასალაც, რომელზეც სავარაუდოდ კვლავ მირზა სუბელიანის და ვიქტორ ჯაფარიძის საუბარია ჩაწერილი. დღეს გავრცელებული აუდიოჩანაწერი, ისევე, როგორც 11 ოქტომბრის და ასევე მეხსიერების ბარათზე არსებული მესამე აუდიოჩანაწერი, რასაკვირველია, მოითხოვს სპეციალურ საექსპერტო კვლევას, რაც უკვე დაწყებულია", — განაცხადა პროკურორმა.

გამოძიება რამდენიმე ვერსიაზე მუშაობს, მათ შორისაა ბრალდებულ მირზა სუბელიანის მცდელობა, ცრუ, მის მიერვე გამოგონილი დანაშაულებრივი ფაქტები გაასაჯაროოს, მუქარით ზემოქმედება მოახდინოს მისი ბრალდების საქმის საბოლოო შედეგზე.

პროკურატურის განცხადებით, ამ დროისთვის, გამოძიება გრძელდება დანაშაულთან შემხებლობაში მყოფი ყველა პირის გამოსავლენად, ასევე მედიასაშუალებით გავრცელებულ ფარულ აუდიოჩანაწერში გახმოვანებულ შესაძლო დანაშაულებრივ ფაქტებთან დაკავშირებით.

პროკურატურის მიერ გავრცელებულ ახალ აუდიოჩანაწერს გამოეხმაურა რუსთავი 2-ის გენერალური დირექტორი, ნიკა გვარამია. მისი თქმით, ჩანაწერი, რომელიც პროკურატურამ გამოაქვეყნა, არა 6 ივლისს, არამედ გუშინ 15 ოქტომბერს ჩაიწერა.

"ამჯერად ნამდვილად დადგეს საუბარი და ჩაიწერეს. დადგმის შინაარსი ასეთია: როგორ დადგეს ჩვენს ეთერში გასული ჩანაწერი და მიზანმიმართულად ილაპარაკეს ის ამბები, რომ მერე რ2-ისთვის გადმოეცათ", — დაწერა ნიკა გვარამიამ ფეისბუქზე.

"მირზა სუბელიანის ჩანაწერები"

14 ოქტომბერს რუსთავი 2-ის მიერ გავრცელებულ აუდიოჩანაწერში, რომლის ავთენტურობა ჯერ არაა დადგენილი, სავარაუდოდ, ხორავას ქუჩის საქმეზე დანაშაულის შეუტყობინებლობისთვის დაკავებული მირზა სუბელიანის საუბარია ასახული. ჩანაწერის მიხედვით, ის ჰყვება, რომ ქართული ოცნების უკანონო საქმიანობის დამადასტურებელი უზარმაზარი რაოდენობის მტკიცებულებები აქვს დაარქივებული. კერძოდ, საუბარია ადამიანთა გატაცებასა და წამებაზე.

პროკურატურაში ამბობენ, რომ გამოძიება 12 ოქტომბერს დაიწყო, თუმცა საგამოძიებო მოქმედებების შესახებ 14 ოქტომბერს, რუსთავი 2-ის მიერ ჩანაწერის გავრცელების შემდეგ გაავრცელა ინფორმაცია.

გაიგე მეტი: