ოქტომბერში ქართული ოცნების მიერ მხარდაჭერილ კანდიდატს, სალომე ზურაბიშვილს შემოწირულობის სახით 1 562 782,3 ლარი გადაურიცხეს. დანარჩენმა 24-მა საპრეზიდენტო კანდიდატმა ოქტომბერში თითქმის 22-ჯერ ნაკლები, 72 675,56 ლარი მიიღო. ეს თანხა კი მხოლოდ სამ პარტიაზე გადანაწილდა:

  • ევროპული საქართველო, დავით ბაქრაძე — 56 000 ლარი;
  • ნაციონალური მოძრაობა, გრიგოლ ვაშაძე — 12 085,56 ლარი;
  • თავისუფალი დემოკრატები, დავით უსუფაშვილი — 4 590;
  • სხვა კანდიდატებს შემოწურლობა ოქტომბერში არ მიუღიათ.

ზურაბიშვილისთვის გადარიცხული თანხა ოქტომბერში მთლიანი შემოწირულობის 95,6 პროცენტია.

ზურაბიშვილის შემომწირველებს შორის არის დეველოპერული კომპანია არქის მეწილე და ხუთი პროექტის დირექტორი თენგიზ წულაია, რომელმაც მას 60 000 ლარი გადაურიცხა. თენგიზ წულაია პარლამენტში ქართული ოცნების დეპუტატის, ივლიანე წულაიას ძმა და ბიზნესპარტნიორია.

ამავე კომპანიის მეწილეებმა და პარტნიორებმა სექტემბერ-ოქტომებრში სალომე ზურაბიშვილს 300 000 ლარი გადაურიცხეს.

გარდა ამისა, მოქალაქეები #ნუყიდისაქართველოს კამპანიის ფარგლებში ისევ აგრძელებენ ზურაბიშვილისთვის 30 თეთრის ჩარიცხვას. ოქტომბერში ზურაბიშვილს 30 თეთრი შვიდმა ადამიანმა გადაურიცხა. საქართველოს მოქალაქეებმა მას შემდეგ დაიწყეს, რაც ზურაბიშვილმა 2008 წლის აგვისტოს ომის დროს სამხედრო მოქმედებების დაწყებაში საქართველო დაადანაშაულა. მოქალაქეები ზურაბიშვილის საარჩევნო კამპანიისთვის 30 თეთრს ურიცხავდნენ და დანიშნულებაში უთითებდნენ "30 ვერცხლის ნაცვლად".

მხოლოდ ოქტომბრის პირველ სამ დღეში სალომე ზურაბიშვილს მილიონ ლარზე მეტი შესწირეს. ბიძინა ივანიშვილის ძმასთან ერთად, ზურაბიშვილის შემწირველთა შორის არის თბილისის მერი კახა კალაძე, რომელმაც დამოუკიდებელ კანდიდატს 50 000 ლარი გადაურიცხა.

ზურაბიშვილის შემწირველთა სიაში ჩაჩავასა და ღუდუშაურის კლინიკების თანამშრომლები მოხვდნენ. პრეზიდენტობის კანდიდატმა თითოეული ექიმისგან 7-დან 50 ათას ლარამდე შემოწირულობა მიიღო.

ზურაბიშვილის მსხვილი შემწირველები და საზოგადოების პროტესტი

სექტემბერში სალომე ზურაბიშვილს 50 000 ლარი შეწირა კოკა-კოლას დირექტორმა და ლაღიძის წყლის მეწილემ ვახტანგ ლაღიძემაც. მას შემდეგ, რაც აღნიშნული ინფორმაცია საჯარო გახდა, მომხმარებლების ნაწილმა კოკა-კოლისა და ლაღიძის წყლის ფეისბუქგვერდებზე ფლეშმობი დაიწყო. ფეისბუქგვერდებზე კომენტარებსა და შეფასებებში იდენტური შინაარსის ტექსტები: "რუსეთის გეგმის დამფინანსებელი! #რუსეთიოკუპანტია #არაოკუპაციას #Russiaisoccupant #Russiaisoccupier" იწერებოდა.