შინაგან საქმეთა სამინისტროს განცხადებით, დანაშაულისთვის ძებნილი 2 პირი დააკავეს. მათი ინფორმაციით, ერთ-ერთი ინტერპოლის წითელი ცირკულარით, მეორე კი საქართველოში 24 წლის განმავლობაში იყო ძებნილი.

უწყების განცხადებით, დაკავებული პირი 1994 წლიდან ძარცვის, ყაჩაღობისა და საპატიმრო დაწესებულებიდან გაქცევისთვის იძებნებოდა. მათი თქმით, დაკავებულს 1994 წლის 6 ივლისს, პროკურორის სანქციით, აღკვეთის ღონისძიების სახით 3-თვიანი წინასწარი პატიმრობა შეეფარდა. იმავე წლის 16 სექტემბერს, წინასწარი პატიმრობის პერიოდში, იგი ახალციხის დროებითი მოთავსების იზოლატორიდან სხვა პირებთან ერთად გაიქცა, რისთვისაც მასზე ძებნა გამოცხადდა.

უწყებაში ამბობენ, რომ 2008 წელს ახალციხის სასამართლოს განაჩენით მის მიმართ შეწყდა საქმე სისხლის სამართლის კოდექსის 151-ე მუხლით გათვალისწინებული დანაშაულის (ძარცვა) ჩადენისათვის. ხოლო საქართველოს სსკ-ს 379-ე მუხლის მე-2 ნაწილით გათვალისწინებული დანაშაულის ჩადენისათვის (დაკავების ადგილიდან, ან პენიტენციური დაწესებულებიდან გაქცევა) 5 წლით თავისუფლების აღკვეთა დაუსწრებლად მიესაჯა.

უწყების განცხადებით, ასევე დააკავეს თურქეთის რესპუბლიკის ინტერპოლის მიერ 2015 წლიდან წითელი ცირკულარით, საერთაშორისო დონეზე ძებნილი პირი. დაკავებულს თურქეთის რესპუბლიკის სისხლის სამართლის კოდექსით ბრალად ედება ცეცხლსასროლი იარაღის უკანონო შეძენა-შენახვაში, კრიმინალური ორგანიზაციის წევრობაში, თავისუფლების უკანონოდ აღკვეთაში, ადამიანის გატაცებაში, მკვლელობასა და გამოძალვაში.

მათივე თქმით, ამჟამად დაკავებული პირის მიმართ მიმდინარეობს კანონით გათვალისწინებული წინასაექსტრადიციო პროცედურები.