საქართველოს შეზღუდული შესაძლებლობის მქონე ქალთა საინიციატივო ჯგუფი საპრეზიდენტო კანდიდატებს შეხვედრაზე იწვევს. მათი განცხადებით, ქალთა მოძრაობის მიერ ორგანიზებულ შეხვედრას საპრეზიდენტო კანდიდატებთან არაადაპტირებული გარემოს გამო ვერ დაესწრენ.

"აღნიშნული აქტივობის მიღმა რომ არ აღმოვჩნდეთ (რაც მიგვაჩნია, რომ დისკრიმინაციული და მეტად არადემოკრატიული პროცესია ), თავად გამოვნახეთ ადაპტირებული გარემო და 2018 წლის 13 ოქტომბერს, 13:00 საათზე, ნაძალადევის მედიათეკაში ვიწვევთ პრეზიდენტობის კანდიდატებს."

შშმ ქალთა საინიციატივო ჯგუფის განცხადებით, აინტერესებთ საპრეზიდენტო კანდიდატების ხედვა ქალთა საკითხებზე შემუშავებულ პროგრამებში შშმ ქალთა ჩართულობასთან დაკავშირებით.

ქალთა მოძრაობის მიერ ორგანიზაბული შეხვედრა 4 ოქტომბერს, პარლამენტის ბიბლიოთეკაში გაიმართა. საქართველოს პრეზიდენტობის კანდიდატები ლეიბორისტული პარტიიდან შალვა ნათელაშვილი, ნაციონალურ მოძრაობიდან გრიგოლ ვაშაძე და მმართველი პარტიისგან მხარდაჭერილი სალომე ზურაბიშვილი ქალთა პრობლემებსა და გენდერულ თანასწორობაზე სასაუბროდ არ მივიდნენ.