საბრძოლო ვაზნების უკანონო შეძენის-შენახვის-ვაჭრობის ბრალდებით თავდაცვის სამინისტროს ორი თანამშრომელი დააკავეს. ინფორმაცია თავდაცვის სამინისტრომ გაავრცელა.

გამოძიების ინფორმაციით, ერთი დაკავებული სარდლობის, შეიარაღებისა და ტექნიკის სარემონტო ბაზის შენახვის განყოფილების საბრძოლო მასალის შენახვის სპეციალისტი იყო, მეორე კი სარდლობის საავტომობილო ბაზის საშტაბო ასეულის მეთაურის მოადგილე. სამხედრო პოლიციის განცხადებით, ბრალდებულებს შეიარაღებისა და ტექნიკის სარემონტო ბაზიდან საბრძოლო ვაზნების გატანაში არასამხედრო პირი ეხმარებოდა.

როგორც განცხადებაშია ნათქვამია, საქმეზე ჩატარებული საგამოძიებო მოქმედებების შედეგად ბრალდებულების ბინიდან, დამხმარე სათავსოდან და ავტომანქანიდან ამოღებულია დიდი რაოდენობით საბრძოლო ვაზნები. ბრალდებულებს აღკვეთის ღონისძიების სახით შეეფარდათ პატიმრობა, რომელთაც ბრალის დადასტურების შემთხვევაში 9-13 წლამდე თავისუფლების აღკვეთა ემუქრებათ.