პარტია ქართული ოცნების თავმჯდომარე, ბიძინა ივანიშვილი ქართული ოცნების გუნდის წევრებს არიგებს, თუ როგორ უნდა უპასუხონ მედიის მიერ ზაზა ოქუაშვილის ბრალდებებზე დასმულ კითხვას.

ივანიშვილმა დაადასტურა, რომ ის შეხვდა ზაზა ოქუაშვილს, ისევე როგორც ხვდებოდა და ხვდება სხვა ბიზნესმენებს, რომლებსაც მისი თქმით, დახმარება სჭირდებათ.

"ჩანაწერების ოსტატი ყოფილა ეს კაცი, ყველას და ყველაფერს იწერდა და რატომღაც, ეს ჩანაწერი არ აქვს. თუ ვინმე გკითხავთ წუხანდელ გადაცემაზე უპასუხეთ, სად არის ეს ჩანაწერები, ყველაფერს იწერდა, გამოიტანოს ამ შეხვედრის ჩანაწერიც და გვაჩვენონ", — განაცხადა ბიძინა ივანიშვილმა.

მისი თქმით, ომეგა ჯგუფის ბრალდებები, რომ ბიძინა ივანიშვილმა მას 4 მილიონი მოსთხოვა ღიმილის მომგვრელია.

"მე მართლაც შევხვდი მას და მართლაც დავეხმარე ისევე, როგორც ვეხმარები ყველა ბიზნესს და მე ეს ვალდებულება დღესაც გამაჩნია. ნებისმიერ ბიზნესმენს, რომელიც მოდის ჩემამდე, პრემიერამდე ან სხვასთან, აქვთ განცდა, რომ ჩვენ მათ დავეხმარებით", - განაცხადა ბიძინა ივანიშვილმა ქართულ ოცნებაში გამართულ გაფართოებულ შეხვედრაზე.

30 სექტემბერს რუსთავი 2-ისთვის მიცემულ ინტერვიუში ბიზნესმენმა, ზაზა ოქუაშვილმა განაცხადა, რომ ყოფილმა პრემიერმა და ქართული ოცნების დამფუძნებელმა მას ოთხი მილიონის გადარიცხვა მოსთხოვა. მისივე თქმით, ივანიშვილმა მას პატრიოტთა ალიანსისა და თავისი მოგების 50%-ით ქართული ოცნების დაფინანსებაც მოსთხოვა. თუმცა, როგორც ის ამბობს, მას პატრიოტთა ალიანსი და ქართული ოცნება აღარ დაუფინანსებია.

ბიზნესმენმა ასევე თქვა, რომ სპორტის ყოფილ მინისტრს, ლევან ყიფიანს ყოფილი პროკურორი, ოთარ ფარცხალაძე ფიზიკურად გაუსწორდა და გაუპატიურებით დაემუქრა.

ზაზა ოქუაშვილი აჭარის უმაღლეს საბჭოში, მისი ცოლი, ნატო ჩხეიძე კი საქართველოს პარლამენტში პატრიოტთა ალიანსის სიით მოხვდნენ. ჩხეიძემ ფრაქციის დატოვების შესახებ რამდენიმე დღის წინ ისაუბრა.