თბილისის მერია განმარტავს, რომ იუსტიციის სახლში დღის განმავლობაში დაფიქსირებული ტაქსის რეგისტრაციის მსურველთა რაოდენობა თითქმის იდენტურია წინა დღეებში დაფიქსირებული რიცხვისა:

"მოთხოვნა არსებითად არ გაზრდილა", — ნათქვამია მერიის განცხადებაში, რომელიც დღეს, 28 სექტემბერს გავრცელდა.

მერიის განცხადებით, დღეს იუსტიციის სახლში მიმდინარეობს მძიმე, მავნე და საშიშპირობებიანი სამუშაოების განმახორციელებელ პირთა საქმიანობის რეგისტრაცია:

"აღნიშნული მიზეზის გამო, ჭარბი მიმართვიანობა დაფიქსირდა არა მხოლოდ თბილისის, არამედ, სხვა ქალაქების იუსტიციის სახლებშიც".

ტაქსების რეგისტრაცია პირველი აგვისტოდან დაიწყო. მერიის განცხადებით, ნებართვის აღება შესაძლებელია, როგორც ელექტრონული ფორმით, ისე თბილისის ათივე რაიონის გამგეობაში. 21 აგვისტოდან ნებართვის მიღება შესაძლებელი გახდა იუსტიციის სახლშიც.

უწყების ცნობით, აღნიშნული მომსახურების განხორციელების მსურველს ნებართვის აღება შეუძლია მომდევნო პერიოდშიც, თუმცა, ნებართვის მოპოვებამდე, ტაქსებს პირველი ოქტომბრიდან ეკრძალებათ მომსახურების გაწევა და ნებართვის არმქონე ტაქსის მფლობელი დაჯარიმდება.

თბილისის იუსტიციის სახლში, ორი კონკრეტული სერვისის გამო მომხმარებელთა რეკორდული რაოდენობა დაფიქსირდა. ჯანდაცვის სამინისტრომ მძიმე, მავნე და საშიშპირობებიან სამუშაოებზე რეგისტრაცია 30 ოქტომბრამდე გადაავადა.

იუსტიციის სახლის განცხადებით, სტრუქტურა მომხმარებელს საგანგებო რეჟიმში 22 საათამდე მიიღებს. იუსტიციის სახლი მუშაობის საგანგებო რეჟიმზეა გადასული.