რიგები და მომხმარებელთა რეკორდული რაოდენობა თბილისის იუსტიციის სახლში (ფოტო და ვიდეო)

თბილისის იუსტიციის სახლში, ორი კონკრეტული სერვისის გამო, რომელთა გაცემის ვადა პირველ ოქტომბრამდე იწურება, მომხმარებელთა რეკორდული რაოდენობაა. იუსტიციის სახლის განცხადებით, დაწესებულება ყველაფერს აკეთებს, რომ მომხმარებლის ნაკადი მართოს, თუმცა რეკორდული რაოდენობის გამო, მომსახურების დრო საგრძნობლად გაზრდილია.

სერვისები, რომლებმაც იუსტიციის სახლში რიგები და ხალხის რეკორდული რაოდენობა გამოიწვია, ტაქსით მომსახურების ლიცენზია და მძიმე, მავნე და საშიშპირობებიანი სამუშაოების განმახორციელებელ პირთა საქმიანობის რეგისტრაციაა.

იუსტიციის სახლის განცხადებით, სტრუქტურა მომხმარებელს საგანგებო რეჟიმში 22:00 საათამდე მიიღებს. იუსტიციის სახლი მუშაობის საგანგებო რეჟიმზეა გადასული.

"თბილისის იუსტიციის სახლი ყოველდღიურად ემსახურება საშუალოდ 8500 მომხმარებელს, რა დროსაც მოქალაქეთა ლოდინის საშუალო დრო 5:36 წუთია. 2018 წლის 28 სექტემბრის 13:00 საათის მდგომარეობით, თბილისის ფილიალი მოემსახურა საშუალოდ 4411 მომხმარებელს, ხოლო მოლოდინში იმყოფება 2289 მომხმარებელი", - აცხადებენ იუსტიციის სახლში.

ცნობილია, რომ ყველა ის პირი, რომელიც ახორციელებს შრომის უსაფრთხოების შესახებ საქართველოს მთავრობის დადგენილებით განსაზღვრულ მომეტებული საფრთხის შემცველ მძიმე, მავნე და საშიშპირობებიან სამუშაოებს, ვალდებულია, შესაბამისი საქმიანობა ეკონომიკურ საქმიანობათა რეესტრში დაარეგისტრიროს. რეგისტრაცია მიმდინარე წლის ივლისის ბოლოს დაიწყო (მთავრობის 27.07.2018წ. N381 დადგენილების ძალაში შესვლისთანავე) და 1-ელ ოქტომბრამდე გრძელდებოდა.

პირველ ოქტომბრამდე ეწურება ვადა ასევე ტაქსით მომსახურების ნებართვის მიღებას, რომელიც 21 აგვისტოდან თბილისის იუსტიციის სახლშიც გაიცემა. აქვე უნდა აღინიშნოს, რომ 1-ელი ოქტომბრიდან არალიცენზირებული ტაქსი დაჯარიმდება, თუმცა ლიცენზიის გაცემა გაგრძელდება ისე, როგორც ამ დრომდე მიმდინარეობდა.

"მიუხედავად იმისა, რომ ორივე სერვისი მინიმუმ თვეზე მეტია მშვიდ ვითარებაში გაიცემა, ვინაიდან 1-ელ ოქტომბრამდე სრულდება მათი გაცემის ვადები, მომხმარებლის დიდმა უმრავლესობამ იუსტიციის სახლს სწორედ სერვისის გაცემის ბოლო დღეს მიმართა", - ნათქვამია იუსტიციის სახლის მიერ გავრცელებულ განცხადებაში.