საქართველოს პატრიარქის ქორეპისკოპოსი, მეუფე იაკობი აცხადებს, რომ პატრიარქის განცხადება, რომლითაც სასულიერო პირებს პოლიტიკოსების არაკორექტულად შეფასებაზე თავის შეკავებისკენ მოუწოდა მას არ ეხება. ამის შესახებ მან ინგა გრიგოლიას ტოქ-შოუ რეაქციაში სატელეფონო ჩართვისას განაცხადა.

"მე ყოველდღე ვხვდები ჩვენს უწმინდესს, დღესაც ვიყავი და იმის გამო ვრეკავ ახლა, რომ იცოდეთ ეგ მიმართვა მე საერთოდ არ მეხება, აბსოლუტურად არ მეხება", — განაცხადა მეუფე იაკობმა და მოუწოდა ჟურნალისტებს, რომ აღარ "დააბრალონ" მას.

მისი განცხადებით, მიმართვის ადრესატი არიან ის სასულიერო პირები, რომლებიც პოლიტიკურ მხარდაჭერას გამოხატავენ ან მტრად მოიხსენიებენ კანდიდატებს. მისივე თქმით, მმართველი პარტიის მხარდაჭერილ კანდიდატს, სალომე ზურაბიშვილსაც არ ჰქონია მის რეპლიკაზე მკვეთრი რეაქცია:

"თქვა, რომ მეუფეს რაც უთხრეს იმ მომენტში იმაზე გასცა პასუხი. თან მე იუმორით გავეცი პასუხი".

მას შემდეგ, რაც სალომე ზურაბიშვილმა განაცხადა, რომ მზად არის კანაფის საინფორმაციო კამპანიას გაუძვღეს მეუფე იაკობმა განაცხადა, რომ ის კანაფის დედოფალი გახდება. მისივე თქმით, ზურაბიშვილს არ აქვს იმდენი ავტორიტეტი, რომ მის სიტყვებს მოუსმინონ.

ზუგდიდისა და ცაიშის მიტროპოლიტლმა მეუფე პეტრემ კი ქადაგებისას საპრეზიდენტო კანდიდატის განცხადებები შეაფასა. მისი თქმით, ბოროტება და ქვეყნის მტრობაა იმის თქმა, რომ საქართველომ ომი დაიწყო.

ამ განცხადებების შემდეგ, მართლმადიდებელი ეკლესიის პატრიარქმა, ილია მეორემ მოუწოდა მღვდლებს თავი შეეკავებინათ პოლიტიკოსების არაკორექტულად შეფასებისაგან.

თავდაპირველად ზურაბიშვილმა განაცხადა, რომ თავს უფლებას არ მისცემდა მეუფეების განცხადებები შეეფასებინა. მოგვიანებით კი აღნიშნა — "ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე".