შინაგან საქმეთა სამინისტროში აცხადებენ, რომ თბილისში, აღმაშენებლის გამზირზე "საქართველოს დარაჯის" გამოჩენის საკითხს უკანონო ფორმირებების შექმნის მუხლით იძიებს. ამის შესახებ On.ge-ს უწყების პრესსამსახურში განუცხადეს.

"ამ დროისთვის, კანონით გათვალისწინებული ყველა შესაბამისი საგამოძიებო მოქმედება ტარდება", — აღნიშნავენ შსს-ში.

თბილისში "საქართველოს დარაჯის" გამოჩენის შესახებ რამდენიმე საათის წინ გახდა ცნობილი. ინფორმაცია ერთ-ერთმა ფეისბუქმომხმარებელმა დახურულ ჯგუფში გაავრცელა. ის ყვებოდა, რომ "საქართველოს დარაჯის" წევრები აღმაშენებლის გამზირზე ჯარისკაცის შარვლებით, შავი მაისურებით მოძრაობენ, აჩერებენ ტურისტებს და პასპორტებს სთხოვენ.

"ეკითხებიან საიდანაა და რისთვისაა ჩამოსული, ძირითადად ირანელებს არაბებს და ა.შ. ამბობენ, რომ არალეგალებს ეძებენ და ებრძვიან... [ხალხს] აწუხებენ და უამრავ უხერხულობას და უსიამოვნებას ქმნიან", — ასე აღწერდა ფეისბუქმომხმარებელი "საქართველოს დარაჯის" წევრების ქმედებებს.

On.ge დაუკავშირდა ქართულ მარშს, რომელსაც სამოქალაქო პატრულის ჩამოყალიბების იდეა ჰქონდა და ჰკითხა იყო თუ არა "საქართველოს დარაჯი" მათი ორგანიზაცია. კონსტანტინე მორგოშიამ განაცხადა, რომ ამ აქტივობასთან კავშირი არ აქვთ, თუმცა ქართული მარშის სამოქალაქო პატრული თბილისის ქუჩებში რამდენიმე თვეა პატრულირებს.