საქართველოს პრეზიდენტმა, გიორგი მარგველაშვილმა განაცხადა, რომ საპრეზიდენტო არჩევნებზე კენჭს არ იყრის რადგან, შეზღუდული უფლებებით იგივე მდინარეში შესვლა არ სურს. მისი თქმით, ამ როლს სხვაც შეასრულებს. ამის შესახებ მარგველაშვილმა ინგა გრიგოლიას გადაცემა რეაქციაში ისაუბრა.

"შეზღუდული უფლებამოსილების ფარგლებში გამოდიოდა, რომ შევდიოდი იგივე მდინარეში, შევდიოდი ნაკლები უფლებებით. ამის სურვილი და მეტიც, რომ ეს არის ერთადერთი საჭიროება და სხვა გამოსავალი არ არსებობს არ მქონდა", - განაცხადა მარგველაშვილმა.

მარგველაშვილის თქმით, შეზღუდული უფლებები პრეზიდენტობას არ აკნინებს, მაგრამ ამ უფლებებით იგივე როლში ყოფნა არ იქნებოდა პროდუქტიული.

"ახლა რომ ვუყურებ საარჩევნო კამპანიას, რამდენად რეალისტურად ხედავთ, როგორც თუნდაც მოქმედ პრეზიდენტს რამხელა უპირატესობა მექნებოდა. მე საარჩევნო კამპანიის პრობლემას ვერ ვხედავდი...

მე არჩევნების მოგების პრობლემა არ დამისახელებია. მე ვხედავდი პრობლემას არჩევნებს რომ მოიგებ მერე რა უნდა ქნა", - განაცხადა მარგველაშვილმა.

გიორგი მარგველაშვილი 2018 წლის საპრეზიდენტო არჩევნებში მონაწილეობას არ მიიღებს და კერძო სექტორს დაუბრუნდება. აღნიშნული გადაწყვეტილების გამო პრეზიდენტი ოპოზიციამ გააკრიტიკა.

გიორგი მარგველაშვილი საქართველოს პრეზიდენტია 2013 წლის 27 ოქტომბრიდან. 2013 წლის მაისში იგი მმართველმა კოალიციამ ქართულმა ოცნებამ პრეზიდენტობის კანიდადატად დაასახელა, რომელმაც ხმათა 62,18 პროცენტით გაიმარჯვა. მისი წარსული დაკავშირებულია პოლიტიკასთან, საზოგადოებრივ და საგანმანათლებლო საქმიანობასთან.

საქართველოში მომდევნო საპრეზიდენტო არჩევნები 2018 წლის 28 ოქტომბერს გაიმართება. საქართველოს პრეზიდენტობა 46 კანდიდატს სურს.