დღეს, 8 სექტემბერს, დინამო არენაზე, საქართველო-ლატვიის თამაშამდე ერთი დღით ადრე, ეროვნული ნაკრების მწვრთნელმა, ვლადიმირ ვაისმა პრესკონფერენციაზე ჟურნალისტის კითხვის პასუხად გურამ კაშიას მხარდაჭერა დააფიქსირა:

"მე როგორც მისმა მწვრთნელმა უნდა ვთქვა, რომ ის ერთ-ერთი საუკეთესო ფეხბურთელი და საუკეთესო ადამიანია. სულ ესაა რასაც ამ თემასთან დაკავშირებით ვიტყვი. უბრალოდ, ჩემთვის ეს სიტუაცია გაუგებარია. როგორც მწვრთნელმა და ადამიანმა მას მხარი უნდა დავუჭირო".

გურამ კაშიას კიდევ ერთხელ გამოუცხადა მხარდაჭერა საქართველოს საფეხბურთო ნაკრების ნახევარმცველმა, გიორგი მერებაშვილმა და თქვა, რომ მთელი გუნდი გვერდით უდგას მას:

"ფეხბურთი არის გუნდური სპორტი და ამ შემთხვევაში, თითოეული ფეხბურთელი ჩვენთვის ძალიან მნიშვნელოვანია. გურამი ძალიან კარგი ფეხბურთელია, კარგი პიროვნებაა, დიდი ხანია ვიცნობ. ჩვენ პროფესიონალი ფეხბურთელები ვართ და ვფიქრობთ, რომ ერთ-ერთი მნიშვნელოვანი თამაშია ქართული ფეხბურთისთვის".

ხვალ, 9 სექტემბერს UEFA-ს ერთა ლიგის ფარგლებში საქართველო - ლატვიას თამაში გაიმართება.

გასული წლის ოქტომბერში, კაშიამ მატჩისას ხელზე ლგბტ დროშის ფერებში სამკლაური გაიკეთა, რაც ცნობიერების ამაღლების კამპანიის ნაწილია. მისი ფოტოს გამოჩენამ, ქართველი მომხმარებლების ნაწილი გააღიზიანა. კაშიამ განაცხადა, რომ ძალადობის წინააღმდეგია და არ ნანობს რაც გააკეთა.

მოგვიანებით, ონლაინ ბულინგის გამო ფეხბურთელმა ფეისბუქის ვერიფიცირებული გვერდი გააუქმა და ინსტაგრამის ანგარიში დახურა. სოციალური ქსელის მომხმარებლები მის მხარდაჭერად გაერთიანდნენ და კამპანია #გურამშენთანვარ დაიწყეს.

კაშიას მხარდაჭერა გამოუცხადა ფეხბურთის ფედერაციამ, თანაგუნდელებმა, ომგუდმსნემა პოლიტიკოსებმა, ჟურნალისტებმა და სხვადასხვა აქტივისტებმა.

თუმცა ამავე მიზეზით, ჰომოფობიურ ნიადაგზე კაშიას მიმართ მუქარა გაგრძელდა. ულტრამემარჯვენე ჯგუფები 9 სექტემბერ ნაკრების თამაშზე კაშიას წინააღმდეგ საპროტესტო აქციას გეგმავენ. თამაშზევე გაიმართება ფეხბურთელის მხარდამჭერი აქციაც.