თბილისის საქალაქო სასამართლომ ქალის დაჭრისთვისა და მისი ყოფილი ქმრის მკვლელობისთვის პოლიციელს 17 წლის თავისუფლების აღკვეთა მიუსაჯა.

სასამართლო განმარტებით, ბრალდებული, არარეგისტრირებულ ქორწინებაში მყოფ ქალზე, გენდერული დისკრიმინაციის მოტივით, სისტემატურად ძალადობდა, ამცირებდა და აყენებდა სიტყვიერ და ფიზიკურ შეურაცხყოფას. 2018 წლის 31 მაისს, ბრალდებული, რომელიც დიდუბე-ჩუღურეთის სამმართველოს მე-2 განყოფილების უბნის ინსპექტორ-გამომძიებელი იყო, მივიდა ყოფილი ცოლის საცხოვრებელ სახლში.

როგორც სასამართლო განმარტავს, ბრალდებულმა ცეცხლსასროლი იარაღიდან ზურგის არეში ესროლა ქალს, ამის შემდეგ კი იმავე იარაღიდან სამი გასროლით სასიკვდილო ჭრილობები მიაყენა ქალის ყოფილ ქმარს. დანაშაული ბრალდებულმა არასრულწლოვნის თანდასწრებით ჩაიდინა.

სასამართლოს განცხადებით, ბრალდებულმა სრულად აღიარა დანაშაული და ბრალდების მხარის მიერ წარმოდგენილი მტკიცებულებები უდაოდ ცნო.

პოლიციელს ბრალად ედებოდა განსაკუთრებული სისასტიკით განზრახ მკვლელობა და ორი პირის განზრახ მკვლელობის მცდელობა განსაკუთრებული სისასტიკით და ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას, ჩადენილი ოჯახის ერთი წევრის მიერ, ოჯახის სხვა წევრის მიმართ. ასევე, მას ბრალად ედებოდა გენდერული დისკრიმინაციის მოტივით ძალადობა, ოჯახის ერთი წევრის მიერ ოჯახის სხვა წევრის მიმართ, სისტემატური შეურაცხყოფა და დამცირება, რამაც ფიზიკური ტკივილი და ტანჯვა გამოიწვია.