მიუხედავად იმისა, რომ წლიდან წლამდე სულ უფრო განებივრებული ვართ ახალ-ახალი სერიალებით, ხშირად ჩვენი ფავორიტი შოუები დასასრულისკენაც მიდის.

ჩვენ უკვე წარმოგიდგინეთ 50 სერიალი, რომელთა პრემიერაც 2018 წლის შემოდგომაზე შედგა, ასევე 13 სერიალი, რომელსაც 2019 წელს განსაკუთრებულად ველოდებით.

ახლა კი დროა ვნახოთ იმ შოუების სია, რომლებიც სამწუხაროდ 2019 წელს ბოლო სეზონს აითვლიან.

The Affair

სერიალის პრემიერა შოუთაიმზე 2014 წელ შედგა და მიუხედავად იმისა, რომ ის არხის ერთ-ერთი ყველაზე წარმატებული სერიალი იყო, მეხუთე სეზონის შემდეგ დასრულდება. ინფორმაცია ამის შესახებ არხის პროგრამების განყოფილების პრეზიდენტმა, გარი ლევინმა დაადასტურა.

The Big Bang Theory

ჩაკ ლორისა და ბილ პრედის სიტკომი უკვე 12 სეზონია ამერიკელების ფავორიტი შოუა. აშშ-ს ისტორიაში დიდი აფეთქების თეორია ყველაზე ხანგრძლივი სიტკომია. მისი მეთორმეტე სეზონის პრემიერა 2018 წლის სექტემბერში შედგა და სავარაუდოდ, მაისის ჩათვლით გაგრძელდება.

Crazy Ex-Girlfriend

უკვე 4 სეზონია რაც CW-ის მაყურებელი რებეკას თავგადასავლებს ადევნებს თვალს, თუმცა არხის გადაწყვეტილებით, შოუ სწორედ ამ სეზონით დასრულდება.

Game of Thrones

HBO-ს ყველაზე წარმატებული სერიალის ფინალური სეზონი 2019 წელის აპრილში გამოვა და როგორც ამბობენ, ის ტელევიზიის ისტორიაში ყველაზე მასშტაბური იქნება.

Gotham

ბრუნო ჰელერის სერიალი, რომელიც DC-ის კომიქსების მიხედვით შეიქმნა, მეხუთე სეზონით 3 იანვარს დაბრუნდა ეთერში და 12 ეპიზოდის შემდეგ დასრულდება.

Homeland

Showtime-ის დრამა მერვე სეზონით დასრულდება. ინფორმაცია ამის შესახებ ოფიციალურად დაადასტურა არხის პრეზიდენტმა და აღმასრულებელმა პროდიუსერმა, დევიდ ნევინსმა. ნევინის თქმით, სერიალის დახურვა არხის გადაწყვეტილება არ ყოფილა და ეს შოუს შემქმნელებს სურდათ.

iZombie

CW-ის კიდევ ერთი შოუ, რომელიც 2019 წელს დასრულდება სწორედ iZombie არის.

Jane the Virgin

სერიალის მეხუთე და ფინალური სეზონი სწორედ წელს გამოვა.

Mr. Robot

პოპულარული ამერიკული სერიალი Mr. Robot მეოთხე სეზონის შემდეგ დასრულდება. ინფორმაცია შოუს დასრულების შესახებ მისმა შემქმნელმა, სემ ისმაილმაც დაადასტურა და თქვა, რომ რემი მალეკთან მუშაობა და ზოგადად, ამ პროექტის შექმნა, მისი კარიერის ერთ-ერთი ყველაზე დიდი მოვლენა იყო.

Veep

HBO-ს ერთ-ერთი ყველაზე წარმატებული სერიალი მეშვიდე სეზონის შემდეგ დაიხურება. შოუში მთავარ როლს ჯულია ლუის-დრეიფუსი ასრულებს, რომელმაც ემის რიგით 69-ე დაჯილდოების ცერემონიალზე საბოლოოდ დაიდგა გვირგვინი და ტელევიზიის ისტორიაში უპრეცენდენტო გამარჯვება მოიპოვა. მსახიობმა 2012 წლის შემდეგ, ზედიზედ ექვსჯერ მიიღო ემი კომედიური სერიალის საუკეთესო ქალი მსახიობის ნომინაციაში.

Orange Is the New Black

ნეტფლიქსის პოპულარული სერიალის შემქმნელებმა დაადასტურეს, რომ შოუ მეშვიდე სეზონით დასრულდება. Orange Is the New Black-ის პირველი სეზონი 2013 წელს გავიდა და მალევე გახდა პოპულარული. შოუს მიღებული აქვს არაერთი პრესტიჟული ჯილდო. ექვსჯერ იყო ნომინირებული ოქროს გლობუსზე.